Тибқи нақшаи муштараки сохторҳои далхдори Мақомоти иҷроияи ҳокимияти давлатии шаҳри Конибодом бо иштироки гурӯҳи тарғиботӣ дар маҷлисгоҳи Коллеҷи омузгории шаҳри Конибодом бо сокинони шаҳр, баҳри пешгирии бемориҳои сироятии ВНМО/БПНМ, терроризму экстремизм, тарзи дуруст истифода намудани шабакаҳои иҷтимоӣ, пешгирии ҷудошавии оилаҳои ҷавон ва дигар масъалаҳои мубрами рӯз, мулоқоти саривақтӣ баргузор гардид.
Мулоқотро мудири шуъбаи рушди иҷтимоӣ ва робита бо ҷомеа – Маҳмудов Баҳодур ифтитоҳ намуда, ҳадафи баргузории онро шарҳ дод.
Урунов Мақсудҷон – вобаста ба пешгирии бемориҳои сироятии ВНМО/БПНМ, сил, нашъамандӣ дар назди иштирокдорон баромад намуд. Инчунин, вобаста ба самтҳои фаъолияташон, аз ҷумла омилу сабабҳои амалҳои номатлуб, пешгирии ҷинояткорӣ дар байни ҷавонону ноболиғон, пешгирии нашъамандӣ, терроризму экстремизм, муқовимат бо коррупсия, тағйироту илова ба Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” таҳлилу андешаҳои судманд намуд.
Сипас мудири бахши Хадамоти муҳоҷират дар шаҳр – Фарзона Толибова оид ба тағйироту иловаҳо дар қонунгузории нави Федератсияи Россия дар самти муҳоҷират, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оид ба донистани забони русӣ, таъриху тамаддун ва асосҳои қонунгузории ин кишвар, тарзи супоридани имтиҳонҳо, гирифтани корти муҳоҷирӣ ва ба қайди муҳоҷирӣ истодан, гирифтани Патент, ба касбомӯзи ва ҳунаромӯзӣ ҷалб намудани занҳои хонашин, баромад намуд ва варақаи иттилоотӣ оид ба касбомӯзӣ ва забономӯзӣ тақсим намуд.
Ҳамзамон, ба сокинони шаҳри Конибодом расонида шуд, ки ҷиҳати қонунигардонӣ дар Федератсияи Россия аз 30 декабри соли 2024, №1126 Фармони Президенти Федератсияи Россия ба тасвиб расидааст, ки аз 28 апрели соли 2025 ба он тағйирот ворид гардида, муҳоҷирони меҳнатӣ, ки мушкилот дар самти ҳуҷҷатгузории худ доранд, метавонанд то санаи 10 сентябри соли 2025 вазъи ҳуқуқии худро ба танзим дароранд.
Дар фарҷоми мулоқот ба саволҳои иштирокдорон ҷавобҳои мушаххас дода шуд.
Раёсати Хадамоти муҳоҷират дар вилояти Суғд
