Санаи 23 январи соли равон, дар синфхонаи МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе якҷоя бо кормандони Маркази захиравии муҳоҷирон (ICMPD) корҳои фаҳмондадиҳиро бо шаҳрвандоне, ки барои фаъолияти меҳнатӣ дар ширкати сохтумонии “United Business Clubs, Bulgaria” (Ҷумҳурии Булғория) омодаанд, баргузор гардид.

Тавре аз Марказ иттилоъ доданд, чанде пеш дар синфхонаи Марказ озмуни шаҳрвандон баргузор гардида буд, ки хоҳишмандон тавассути маҷозӣ бо кордиҳанда аз таҷирибаи кории худ маълумот пешниҳод намуданд.

Дар рафти мулоқот ҷиҳати бо ҷойи кор таъмин намудани шаҳрвандони ҷумҳурӣ дар хориҷи кишвар тавсияҳо дода шуда, таъкид гардид, ки худро аз миёнаравон канора гирифта, ба ҳар гуна ҳизбу ҳаракатҳои ифротӣ ҳамроҳ нашудан ва бе чуну чаро риоя намудани қонунҳои давлати қабулкунанда мебошад.

Бояд тазаккур дод, ки ширкати мазкур ба шаҳвандони Ҷумҳурии Тоҷикистон кор дар самти сохтумониро бо музди маоши аз 700 евро боло бо ҷойи зисти ройгон ва як вақт хӯрока пешниҳод намуд.

Баъд аз марҳилаҳои омодасозӣ шаҳрвандони ҷумҳурӣ ба Ҷумҳурии Булғория сафарбар мегарданд.

Маркази матбуоти Хадамоти муҳоҷират