Бо мақсади гузаронидани корҳои иттилоотрасонӣ миёни шаҳрвандон – муҳоҷирони меҳнатӣ ва аъзои оилаи онҳо оид ба тағйиротҳои қонунгузории кишвари Россия дар самти муҳоҷирати меҳнатӣ, оид ба пешгирии шомилшавии ҷавонон ба ҳизбу ҳаракатҳои ифротӣ, савдои одамон ва тарзи дурусти ба расмият дарории ҳуҷҷатҳо, вохӯрии мудири бахши Хадамоти муҳоҷират дар ноҳияи Ашт Назарова Сулҳия дар якҷоягӣ бо намояндаи шуъбаи Агентии меҳнат ва шуғли аҳолӣ Мамадҷонова Ойсара дар ҷамоати деҳоти Ориён баргузор гардид.
Зимни вохӯрӣ қайд карда шуд, ки санҷиши пеш аз сафар – кафолати муҳоҷирати бехатар мебошад.
Мудири бахши Хадамоти муҳоҷират дар ноҳияи Ашт қайд намуд, ки манъи вуруди шаҳрвандони хориҷӣ дар қаламрави Федератсияи Россия аз ҷониби мақомотҳои марбутаи кишвари иқомат дар ҳолати риоя накардани қонунгузориҳои кишвари иқомат татбиқ карда мешавад.
Шаҳрвандони Ҷумҳурии Тоҷикистонро зарур аст, ки пеш аз сафар ба қаламрави Федератсияи Россия манъи воридоти худро санҷиш намуда, баъдан чиптаи ҳавопаймо харидорӣ намоянд, чун ҳангоми ворид шудан дар кишвари қабулкунандаи қувваи корӣ наметавонанд аз сарҳади давлатӣ гузаранд ё худро дар қайди муҳоҷиратӣ гузоранду иҷозатномаи фаъолияти меҳнатӣ (патент) дастрас намоянд.
Инчунин, агар вуруди шаҳрванди хориҷӣ ба Федератсияи Россия манъ шуда бошад ва дар қаламрави он қарор дошта бошад, ӯро зарур аст, ки дар муҳлати кутоҳтарин аз қаламрави Федератсияи Россия берун барояд. Дар ҳолати баромада нарафтан тибқи талаботи қонунгузории кишвари иқомат вурудаш ба муҳлати 3, 5 ва ё 10 сол манъ карда мешавад.
Шаҳрвандони Ҷумҳурии Тоҷикистон, ки барои фаъолияти меҳнатӣ ба Федератсияи Россия меоянд зарур аст, ки талаботҳои будубоши кишвари иқоматро риоя намуда, дар доираи қонунугузории Федератсияи Россия фаъолият намоянд.
Баъдан ба шаҳрвандон вобаста ба хатару таҳдидҳои замони муосир, фаъолияти ташкилотҳои террористиву экстремистидошта, пешгирӣ аз ҷинояту ҷинояткорӣ, савдои одамон, риояи ҳолатҳои санитариву гигиенӣ, коррупсиони, хатари бемориҳои сироятӣ ва роҳҳои сироятшавии шаҳрвандон машварат дода шуд.
Раёсати Хадамоти муҳоҷират дар вилояти Суғд
