Кормандони МД “Марказҳои машваратӣ ва омодагии пеш аз сафари муҳоҷирони меҳнатӣ” – и Хадамоти муҳоҷират вохӯрии маърифатиро бо сокинони Ҷамоати деҳоти Рӯдакӣ ноҳияи Восеъ, аз ҷумла муҳоҷирони меҳнатӣ баргузор намуданд.
Дар рафти вохӯрӣ оид ба навовариҳо дар қонунгузории Федератсияи Россия роҷеъ ба муҳоҷирати меҳнатӣ, аз ҷумла будубош дар ин кишвар, тарзи гирифтани Патент, иҷозаи кор, қайди муваққатӣ, инчунин, ба муҳоҷирони меҳнатие, ки рафтуомадашон ба қаламрави кишвари Россия манъ гардидаасту хоҳиши дар ширкатҳои сохтмонии “НБО Роғун” кор карданро доранд, ба Раёсати Агентии меҳнат ва шуғли аҳолии Ҷумҳурии Тоҷикистон дар вилояти Хатлон муроҷиат намоянд, тавсия дода шуд.
Ҳамзамон сокинони ҷамоат ба баромадкунандагон дар бораи чи тавр ба даст овардани Сертификати забони русӣ, донистани таърих ва асосҳои қонунгузории Федератсияи Россия саволҳо дода шуда ба ҳар яки онҳо ҷавобҳои мушаххас гирифтанд.
Баромадкунандагон бори дигар таъкид намуданд, ки пеш аз сафар ҳар як шаҳрванди ҷумҳурӣ бояд огоҳ бошад, ки тибқи қонунгузории давлати зикргардида барои омода намудани ҳуҷҷатҳо ва гирифтани Патент мӯҳлати 30 рӯзи тақвимӣ муқаррар шудааст, ва аз ҳар яки онҳо масъулияти баланд талаб менамояд ва баъд аз гирифтани Патент онҳо вазифадоранд, саривақт маблағи онро супорида, фаъолияти меҳнатии худро идома диҳанд.
Ҳамзамон ба маълумоти иштирокчиён расонида шуд, ки тибқи қонуни Федералӣ “Дар бораи будубоши қонунии шаҳрвандони хориҷӣ дар Федератсияи Россия” аз 25 июли соли 2002, №115-ФЗ ва ворид намудани тағйиру иловаҳо ба қонуни Федералӣ аз 15 августи соли 1996 “Дар бораи тартиби даромад ба Федератсияи Россия ва баромад аз ҳудуди Федератсияи Россия”, ки 24-ноябри соли 2014 тахти № 357 ФЗ таҳия гардидааст, амалӣ карда мешавад.
Шарҳи қонуни мазкур ба шаҳрвандон – муҳоҷирони меҳнатии тоҷик, ки бояд дар баробари гирифтани патент, қайди ҷойи истиқомат, донистани забон, расму оин, таърих ва фарҳанги кишвари иқомат, минбаъд бояд талаботҳои қонуни мазкурро, ки дар он масъалаи будубоши шаҳрвандро 90 ба 180 рӯз нишон додааст, бечунучаро риоя намоянд.
Шаҳрвандони хориҷӣ, аз ҷумла муҳоҷирони меҳнатии Ҷумҳурии Тоҷикистон ҳангоми ворид гардидан ба Федератсияи Россия метавонанд, ки 90 рӯз фаъолияти меҳнатӣ намуда, баъди он бояд кишвари иқоматро тарк намуда, 90 рӯзи боқимондаро дар қаламрави Ҷумҳурии Тоҷикистон (ё кишвари дигар) паси сар намоянд.
Баъди гузаштани муҳлати муқарраргардида шаҳрванд метавонад дигарбора вуруди қаламрави Федератсияи Россия гардида, фаъолияташро идома диҳад.
Талаботҳои қонуни мазкур (90 ба 180) ба шаҳрвандони хориҷии зерин амалӣ намегардад;
- шаҳрвандони хориҷие, ки дар асоси гирифтани Патент фаъолият менамоянд;
- шаҳрвандони хориҷие, ки иҷозати иқомати мувакқатиро доранд (Разрешение на временное проживание);
- шаҳрвандони хориҷие, ки дорои иҷозатномаи иқоматро дар ҳудуди Россия доранд (Вид на жительство);
- гурезагон ва муҳоҷироне, ки паноҳандагии мувакқатӣ доранд;
- донишҷуёни хориҷие, ки ба таҳсили рӯзона фаро гирифта шудаанд.
Таҳлилҳо нишон медиҳанд, ки айни ҳол қисми зиёди шаҳрвандон – муҳоҷирони меҳнатии Ҷумҳурии Тоҷикистон бо ба инобат нагирифтани талаботи қонуни мазкури 90 ба 180 аз ҳудуди Федератсияи Россия хориҷ (депортатсия) гардида истодаанд.
Бинобар аҳамияти ҷиддӣ доштани масъалаи мазкур ва бо мақсади роҳ надодан ба чунин қонунвайронкуниҳо ба сокинони Ҷамоати деҳоти Рӯдакӣ ноҳияи Восеъ, муфассал фаҳмонида дода шуд.
Ғайр аз ин, дар вохӯрӣ ба сокинони ноҳия расонида шуд, ки дар Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ»-и Хадамоти муҳоҷират дар шаҳри Душанбе, вилоятҳои Хатлону Суғд ва ВМКБ қайди шаҳрвандон барои фаъолияти меҳнатӣ, дар хориҷи кишвар оғоз гардидааст.
Хоҳишмандон метавонанд ба суроғаи: кӯчаи Айнӣ 121, Хадамоти муҳоҷират Муассисаи давлатии “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе, инчунин шаҳрҳои Бохтар, Хуҷанд ва Хоруғ муроҷиат намоянд.
Телефонҳо барои тамос: 225-08-33; 225-05-75;
Маркази матбуоти Хадамоти муҳоҷират
