Кормандони масъули Раёсати  Хадамоти муҳоҷират дар вилояти Суғд вобаста ба вазъи омаду рафти муҳоҷирони меҳнатӣ ба Федератсияи Россия  дар терминали мусофиркашонии роҳи “Абрешим”, “Фурудгоҳи байналмилалии Хуҷанд” ва  “Истгоҳи роҳи оҳан” бо муҳоҷирони меҳнатӣ, ки ба самти шаҳрҳои гуногуни Федератсияи Россия сафар менамоянд, корҳои иттилоотӣ -маърифатӣ баргузор намуданд.

Дар рафти суҳбату мулоқот бо шаҳрвандон фаҳмонида шуд, ки фаъолияти кории ҳар як муҳоҷири меҳнатӣ берун аз ватан ба омодагии пешакии ӯ вобастагӣ дорад.

Ҳар як шаҳрванд пеш аз сафар бояд омодагии ҷиддӣ дида, забони давлати қабулкунанда, таъриху тамаддун ва асосҳои қонунгузории давлати қабулкунандаро дониста баъд ба сафар барояд.

Дар суҳбат бо муҳоҷирони меҳнатӣ, доир ба тағйиру иловаҳо ба қонунгузории Федератсияи Россия дар самти муҳоҷирати меҳнатӣ, ҷиҳати будубоши шаҳрвандони Ҷумҳурии Тоҷикистон дар давлати номбурда, омодагӣ  пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оид ба донистани забони русӣ, таъриху тамаддун ва асосҳои қонунгузории ин кишвар (тарзи супоридани имтиҳонҳо), доштани касби мувофиқ ва  ҳуҷҷати тасдиқкунандаи он, корти  муҳоҷирӣ, дар қайди муҳоҷирӣ истодан, гирифтани Патент, тартиб додани шартномаи меҳнатӣ, танҳо бо шиносномаи хориҷӣ ворид шудан суханронӣ намуданд.

Ҳамзамон ба шаҳрвандон дар бораи шомил нашудан ба ҳизбу ҳаракатҳои ифротгароӣ, экстремизм ва терроризм ва муқовимат ба савдои одамон ва расонидани кумак ба қурбониёни савдои одамон суҳбатҳо намуда ба ҳар яки онҳо дастурамали мухтасар оиди муҳоҷирати бехатар, буклетҳо, варақаҳои иттилоотӣ-маърифатӣ тақсим карда шуд.

Раёсати Хадамоти муҳоҷират дар вилояти Суғд