Бо ибтикори шуъбаи Хадамоти муҳоҷират дар шаҳри Исфара дар ҳамбастагӣ бо Ҳизби Халқи Демократии Тоҷикистон дар шаҳри Исфара, Раёсати Агентии меҳнат ва шуғли аҳолӣ дар Ҷамоати шаҳраки Шуроб бо фаъолону сокинони ҷамоат, раисони маҳаллаҳо ва оилаҳои муҳоҷирони меҳнатӣ бо иштироки зиёда аз 120 нафар шаҳрвандон вохӯрӣ доир намуданд.

Мулоқот таҳти роҳбарии муовини раиси шаҳри Исфара –Зиёваддинзода С., доир гашт.

Дар вохурӣ ҳар яке оид ба мавзӯъҳои гунонгун суханронӣ намуданд.

Аз тарафи сардори шуъба Ахмедов М., вобаста ба мавзӯи “Муҳоҷирати бехатар” суханронӣ намуда қайд кард, ки муҳоҷирати бехатар маънои онро дорад, ки муҳоҷирон аз ҳама гуна хатарҳои марбут ба саломатӣ, вазъи ҳуқуқӣ ва ҳаёти онҳо дар ҳама марҳилаҳои раванди муҳоҷират (дар кишварҳои аслӣ, транзит ва қабулкунанда) ҳифз карда шудаанд.

Омилҳои асосӣ барои фароҳам овардани шароит барои ҳаракати одамон – ин ба роҳ мондани ҳамоҳангсозӣ дар сатҳи маҳаллӣ, миллӣ ва минтақавӣ баҳри таъмин намудани ҳифзи ҳуқуқи муҳоҷирон мебошад.

Аз ҷумла, мукаммал намудани қонунгузорӣ дар самти муҳоҷират бо назардошти чаҳорчӯбаи миллӣ ва байналмилалӣ ва тамоюлу чолишҳои мубрам.

Хуб омода намудани муҳоҷирон пеш аз сафар, таъмин намудани онҳо бо маълумоти саҳеҳ дар ҳама марҳилаҳо – пеш аз муҳоҷират, дар рафти он ва пас аз бозгашт, баланд бардоштани маърифати молиявии муҳоҷирон ва оилаҳои онҳо, маълумотнокии муҳоҷирон оид ба хизматрасониҳои мавҷуда дар давлатҳои аслӣ ва қабулкунанда роҳҳои муҳими таъмини бехатарии ҷараёни муҳоҷират мебошанд.

Дар охир ба суолҳои сершумори иштирокдорон посухҳои мушаххас дода шуд.

Шуъбаи Хадамоти муҳоҷират дар шаҳри Исфара