Зан ҳамчун яке аз асосҳои муҳими ҷомеа ҳамеша нақши калиди дар рушди фарҳангӣ, иҷтимоӣ ва иқтисодии ҷомеа доштааст. Мақоми зан дар ҷомеа на танҳо дар шинохти ҳуқуқӣ ва сиёсӣ, балки дар тарбияи наслҳо, ҳифзи анъана ва фарҳанг ва пешрафти умумии ҷомеа инъикос меёбад.
Зан дар ҷомеа ҳамеша ҳамчун модар, ҳамсар ва аъзои фаъолии ҷамъият мавқеи муҳим дорад. Ӯ на танҳо тарбиятгари насли оянда аст, балки ҳамчун намунаи ахлоқӣ ва фарҳангӣ нақши таъсиргузорро иҷро мекунад. Занони фаъол дар ҷомеа метавонанд ҳамчун омӯзгор, духтур, муҳандис ё намояндагони мақомоти давлатӣ нақши худро дар пешрафти ҷомеа намоиш диҳанд.
Дар Паём зикр гардид, ки занону духтарон дар рушди иқтисоди миллӣ, таҳкими давлатдорӣ ва ҳифзи арзишҳои фарҳангӣ саҳми арзанда доранд. Давлат сиёсати худро ба фароҳам овардани шароити баробар барои таҳсил, касбомӯзӣ ва фаъолияти меҳнатии занон равона намудааст. Ин иқдом имконият медиҳад, ки занон дар вазифаҳои роҳбарӣ ва соҳаҳои гуногуни хоҷагии халқ фаъол бошанд.
Дар кишварамон барномаҳои давлатӣ барои баланд бардоштани мақоми занон амал мекунад. Кумитаи кор бо занон ва оилаи назди Ҳукумати Ҷумҳурии Тоҷикистон дар самти ҳимояи ҳуқуқ, рушди саводнокӣ ва ҷалби занон ба идоракунии давлатӣ фаъолият мебарад. Илова бар ин, масъалаи пешгирии зуроварӣ, баланд бардоштани сатҳи маърифати ҳуқуқӣ ва ҷалби занон ба соҳибкорӣ низ аз самтҳои муҳими сиёсати давлатӣ арзёби гардид.
Зан ҳамчун ҷузъи асосии ҷомеа нақши бисёрҷанба ва муҳиме дорад, ҳифз ва дастгирии ҳуқуқҳои занон, баланд бардоштани сатҳи маълумот ва фароҳам овардани имкониятҳои баробар ба пешрафти ҷомеа ва бунёди ҷомеаи солим мусоидат мекунад. Ҳар ҷомеае, ки занони фаъол ва боистеъдод дорад, бовари дошта метавонад, ки ояндаи дурахшон ва устувор хоҳад дошт.
Қонунҳо танҳо ҳуҷҷат нестанд – онҳо кафолати адолат ва баробарӣ мебошанд. Барои таҳкими мақоми зан дар ҷомеа на танҳо қабули қонун, балки иҷрои дурӯсти он ва боло бурдани маърифати ҳуқуқии шаҳрвандон муҳим аст.
Зан нерӯи созанда ва пояи устувории ҷомеа мебошад. Ҳифзи ҳуқуқи ӯ – ҳифзи ояндаи миллат аст.
Саторова Манзурат,
Сардори шуъбаи Хадамоти муҳоҷират дар шаҳри Хуҷанд
