Фарорасии фасли зимистон масъулиятнокии кормандони Шуъбаи баҳисобгирӣ ва хизматрасонӣ ба муҳоҷирон дар ҶСК «Фурудгоҳи байналмилалии шаҳри Душанбе» ва КВД “Истгоҳи роҳи оҳани шаҳри Душанбе”-и Раёсати Хадамоти муҳоҷират дар шаҳри Душанберо дучанд намуд.

Ба гуфтаи иҷрокунандаи вазифаи мудири шуъба Шамшод Гулаҳмадов, ҳамарӯза кормандони масъули Шуъба ба муҳоҷирони меҳнатие, ки азми сафари Федератсияи Россияро доранд, оид ба тағйиру иловаҳо дар қонунгузории муҳоҷиратии кишвари Россия суҳбату вохӯриҳои муфид мегузаронанд.

Бояд қайд кард, ки кормандони Шуъба ҳамеша дар роҳи ҳарчи хубтару беҳтар кумак намудан ба шаҳрвандон-муҳоҷирони меҳнатӣ мебошанд. Онҳо саъю кӯшиш ба харҷ медиҳанд, ки ба сокинони ҷумҳурӣ маслиҳатҳои ҳуқуқӣ дода, онҳоро ба муҳоҷирати бехатар, шомил нашудан ба ҳар гуна ҳаракатҳои ифротгароӣ экстремистӣ ҳидоят мекунанд.

Кормандони Шуъба ҳамеша пеш аз парвоз ба сафаркунандагон муроҷиат намуда мегӯянд, ки ҳар як сокини ҷумҳурӣ тибқи қонунгузории нави Федератсияи Россия ҳатман аз фанни забони русӣ, таърих ва қонунгузории ин кишвар имтиҳон месупоранд. Шахсоне, ки онро бомуваффақият аз худ мекунад соҳиби Сертификат гардида, ҳуқуқи гирифтани Патент ва қайди муваққатӣ мегардад.

Аз ин лиҳоз, Шуъбаи баҳисобгирӣ ва хизматрасонӣ ба муҳоҷирон дар ҶСК «Фурудгоҳи байналмилалии Душанбе» ва КВД «Истгоҳи роҳи оҳани Душанбе»-и Раёсати Хадамоти муҳоҷират дар шаҳри Душанбе аз шаҳрвандони ҷумҳурӣ эҳтиромона хоҳиш менамояд, ки пеш аз сафар ба кишвари Федератсияи Россия ҳатман, ба МД “Марказҳои машваратӣ ва омодагӣ пеш аз сафари муҳоҷирони меҳнатӣ” дар шаҳри Душанбе муроҷиат намуда, аз забон, таърих ва қонунгузории кишвари Россия имтиҳон супорида, соҳиби Сертификат гарданд.

Дар ҳолати надонистани ин номгӯ аз сафари меҳнатӣ худдорӣ намуда ба Хадамоти муҳоҷират ва зерсохторҳои он дар шаҳру ноҳияҳо ва вилоятҳо муроҷиат намоянд.

Шуъбаи баҳисобгирӣ ва хизматрасонӣ ба муҳоҷирон дар ҶСК «Фурудгоҳи байналмилалии шаҳри Душанбе» ва КВД “Истгоҳи роҳи оҳани шаҳри Душанбе”-и Раёсати Хадамоти муҳоҷирати дар шаҳри Душанбе