Имрӯз дар кишвари соҳибистиқлоламон фазои мусоиди сулҳу субот ва зиндагии осоишта фароҳам омада, бо меҳнати содиқонаву софдилонаи фарзандони бонангу номуси миллат пояҳои давлатдории миллатамон рӯз аз рӯз таҳким меёбанд. Мо имрӯз ифтихор аз он дорем, ки 34 – сол, қабл аз ин нахустин хиштҳои пойдевори Истиқлолияти воқеӣ ва давлатдории худро ниҳода, аз шарофати мустақилият ҷомеаи комилан демократию дунявиро барпо карда истодаем.
Истиқлолият шараф ва номуси ҳар як миллати озодандеш ва соҳибхирад, рамзи саодати миллат ва давлати соҳибихтиёри миллӣ, нишонаи пойдориву бақои он мебошад. Зеро дар дунёи пуртазоди муосир миллате соҳиби ному иззат шуда метавонад, ки истиқлоли воқеӣ ва давлати озоду мустақили худро дошта бошад.
Воқеан, истиқлолият барои мо рамзи олии ватану ватандорӣ, бузургтарин неъмати давлатсозию давлатдории мустақил, кору пайкори пайгиронаи созандагӣ, бо азму талошҳои фидокорона расидан ба истиқлолияти сиёсӣ, иқтисодӣ ва фарҳангиро омӯзонида, меъёрҳои ҷомеаи шаҳрвандиро таҳти роҳбарии Пешвои муаззами миллат муҳтарам Эмомалӣ Раҳмон таҳким бахшид ва дар як вақт ҳаёти озодонаи ҳар фард ва олитарин дараҷаи бахту саодати воқеии миллатро таъмин намуд.
Дар ин асно, санаи 28-уми августи соли равон дар ноҳияи Варзоб бахшида ба 34-солагии Истиқлоли давлатии Ҷумҳурии Тоҷикистон бо ташаббуси Кумитаи иҷроияи Ҳизби Халқии Демократии Тоҷикистон дар ҳамкорӣ бо Мақомоти иҷроияи ҳокимияти давлатии ноҳияи Варзоб, ташкилоти ибтидоии ҳизбии “Шуғл ва муҳоҷират” ва намояндагии Ташкилоти ҷамъиятии ҷавонон “Созандагони Ватан” мизи мудаввар зери унвони “Истиқлолият волотарин ва боарзиштарин дастоварди миллат” таҳти Раёсати раиси Кумитаи иҷроия Қосимзода Маҳтоб Пир, муовини раиси ноҳияи Варзоб Ҳусейнзода Сироҷиддин Бобо, сармуҳаррири Муассисаи давлатии ҳафтаномаи “Варзоб” Маҷнуни Карим ва раиси ташкилоти ибтидоии ҳизбии “Шуғл ва муҳоҷират”, роҳбари намояндагии Ташкилоти ҷамъиятии ҷавонон “Созандагони Ватан” Олимзода Орифҷон Олим доир гардид, ки дар рафти он роҳбарони ташкилотҳои ибтидоии ҳизбӣ, кормандони раёсат, шуъба ва бахшҳои мақомоти иҷроия ва воҳидҳои сохтории он, соҳаҳои маорифу тандурустӣ ва собиқадорони ҳизб иштирок намуданд.
Нахуст, раиси Кумитаи иҷроияи Ҳизби Халқии Демократии Тоҷикистон дар ноҳияи Варзоб Қосимзода Маҳтоб Пир чорабиниро оғоз намуда, иштирокчиёнии мизи мудавварро ба ифтихори 34-солагии Истиқлоли давлатии Ҷумҳурии Тоҷикистон табрику таҳният намуданд.
Дар ин замина, баромадкунандагон роҷеъ ба мавзуъҳои “Истиқлолият волотарин ва боарзиштарин дастоварди миллат”, “Истиқлолият рамзи бедории миллат”, “Истиқлолият ва дастовардҳои беназири он” баромад намуда, изҳор доштанд, ки имрӯз бо ибтикори Асосгузори сулҳу ваҳдати миллӣ – Пешвои миллат, Президенти кишвар, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон мардуми шарафманду сарбаланди Тоҷикистони азиз бо тамоми ҳастӣ дарк менамоянд, ки истиқлолият муқаддастарин ва азизтарин неъмат, рукни асосии давлати озод, рамзи шарафу номуси ватандорӣ, кафолати хонаи ободу неруи таконбахши ҳаёти ҳарӯзаи мо мебошад.
Илова бар ин, баромадкунандагон ёдовар шуданд, ки дар давоми солҳои соҳибистиқлолӣ дар ҳаёти сиёсӣ, иқтисодӣ ва фарҳангии кишвари азизамон руйдодҳои бузурги таърихӣ ба вуқуъ пайвастанд. Ба истифода додани иншооти бузург аз қабили бунёди роҳҳо, бинои нави истиқоматии замонавӣ, биноҳои маъмурӣ, биноҳои нави донишгоҳу муассисаҳои таълимӣ, варзишгоҳ, майдончаҳои варзишӣ ва боғҳои истироҳатӣ дар шаҳри Душанбе, муассисаҳои тиббиву табобатӣ, бунёди гулгаштҳо, идома ёфтани сохтмони бузурги аср НБО “Роғун” дастовардҳои бузурги мардуми Тоҷикистон ба истиқболи ҷашни милиямон Истиқлоли давлатӣ мебошад.
Дар баробари ин, баромадкунандагон таъкид карданд, ки дастоварди бузургтарини мо дар тули 34-соли Истиқлолият барқарор намудани сулҳу суботи комил ва ваҳдати пойдори миллӣ, таъмини рушди устувори иқтисодиву иҷтимоӣ, таҳкими худшиносиву худогоҳӣ, болоравии ҳисси ватандӯстиву ватандорӣ дар миёни тамоми табақаҳои ҷомеаи Тоҷикистон аст, ки маҳз ба шарофати хиради азалии мардуми соҳибмаърифату фарҳангдӯсти тоҷик муяссар гардид.
Дар фарҷом ба як қатор роҳбарони ташкилотҳои ибтидоии ҳизбӣ ва фаъолони ҲХДТ барои фаъолияти назаррас ва баланд бардоштани нуфуз ва мавқеъи ҳизб дар ҷомеъа бо сипосномаи Кумитаи иҷроия қадршиносӣ гардидаанд. Инчунин, озмуни ноҳиявӣ бахшида ба Истиқлоли давлатӣ байни хонандагони муассисаҳои таълимӣ иншо дар васфи Истиқлолият ҷамъбаст гардида, ғолибони озмун бо “Диплом” ва туҳфаҳои хотиравӣ қадрдонӣ гардиданд.
Хулоса, мо миллати сарбаланди тоҷик аз масъулияти баланди ватанпарварии Сарвари давлатамон, муҳтарам Эмомалӣ Раҳмон ифтихор мекунем ва ҳамеша бо сиёсати пешгирифтаи Пешвои маҳбуби миллат пайравӣ намуда, ба Ҷаноби Олӣ содиқ мебошем ва баҳри рушди Тоҷикистони соҳибистиқлол ва афзун гардонидани дастовардҳои он садоқатмандона хизмат мекунем.
Бахши Хадамоти муҳоҷират дар ноҳияи Варзоб
