Бо ибтикори Мақомоти иҷроияи ҳокимияти давлатии шаҳри Левакант дар якҷоягӣ бо КИ ҲХДТ дар толори хурди бонки “Ориёнбонк” таҳти унвони “Пешгирии хушунат ва зуроварӣ дар оила” мизи мудаввар доир гардид.

Дар мизи мудаввар баромадкунандагон, оид ба мафҳумҳои асосии Қонуни Ҷумҳурии Тоҷикистон дар бораи пешгириии зӯроварӣ дар оила, ки муносибатҳои ҷамъиятиро вобаста ба пешгирии зӯроварӣ дар оила танзим ва пешгирӣ, бартарафсозии сабаб ва шароитҳои ба он мусоидаткунандаро муайян менамояд суханронӣ намуда, аз ҷумла қайд намуданд, ки – зӯроварӣ дар оила – кирдори зиддиҳуқуқии қасдонаи дорои хусусияти ҷисмонӣ, рӯҳӣ, шаҳвонӣ ё иқтисодӣ, ки дар доираи муносибатҳои оилавӣ аз ҷониби як узви оила нисбат ба дигар узви оила содир шуда, боиси поймол шудани ҳуқуқ ва озодиҳои ӯ, расонидани дарди ҷисмонӣ ё зарар ба саломатии ӯ мегардад  ба вуҷуд меорад. Ҳамзамон, зикр гардид, ки агарчанде дар урфу одатҳои мардуми мо ҳангоми оиладоршавӣ раъйи волидон ба назар гирифта мешавад, вале ин маънои онро надорад, ки бояд миёни онҳо шартнома баста шавад.

Заминаи таъсиси оила муҳаббату ҳусни тафоҳум ва ихтиёрию озод будани ҷавонон аст. Чун сухан дар бораи ҳуқуқу вазифа ва уҳдадориҳои ду шаҳрванди комилҳуқуқи қобили амал меравад, ягон зарурат ҷиҳати бастани қарордод миёни волидон нест ва қонунгузории Тоҷикистон низ чунин шартномаро танҳо миёни нафароне, ки издивоҷ мекунанд, иҷозат додааст. Чунончи, дар моддаи 40-и Кодекси оилаи Ҷумҳурии Тоҷикистон омадааст: “Аҳдномаи ақди никоҳ – созишномаи шахсоне мебошад, ки издивоҷ мекунанд ё созишномаи зану шавҳар аст, ки ҳуқуқи амволӣ ва уҳдадориҳои онҳоро дар  давраи ҳамзистӣ – зану шавҳарӣ ва (ё) дар ҳолатҳои бекор кардани он муайян менамояд”.

Дар муҳокимаи масъалаи муҳоҷирати меҳнатӣ, намояндаи бахши Хадамоти муҳоҷират дар шаҳри Левакант баромад намуда, оид ба масъалаҳои марбут ба муҳоҷирати қонунӣ ва бехатар, қоидаҳои будубош дар Федератсияи Россия, бастани шартномаҳои меҳнатӣ ва риояи кардани қоидаҳои бехатарии меҳнатӣ сухан гуфта, таъкид намуд, ки шуғли расмӣ барои ҳифзи ҳуқуқ ва манфиатҳои муҳоҷирон аҳамияти хоса дорад.

Ҳамзамон, дар бораи таҳдидҳо вобаста ба ҷалби муҳоҷирон ба гурӯҳҳои радикалӣ, террористӣ ва ҷиноятӣ иброз намуда, қайд намуд, ки зарур аст ҷавонон бештар ба таҳсил дар мактабҳо, коллеҷҳо ва донишкадаҳо ҷалб карда шаванд.

Илова бар ин, таваҷҷуҳи ҳозирин ба масъалаҳои тандурустӣ низ ҷалб карда шуд. Аз ҷумла, маълумот дар бораи бемориҳои вирусӣ, махсусан ВИЧ/СПИД ва сил пешниҳод гардид. Таъкид шуд, ки риояи меъёрҳои беҳдоштӣ ва нигоҳубини саломатӣ омили муҳими пешгирии ин бемориҳо мебошад.

Дар анҷоми мизи мудаввар таъкид гардид, ки зуроварӣ ва пешгирии он, таҳкими рукнҳои оиладорӣ, омилҳо ва роҳҳои устувории оилаҳои ҷавон, ки мавриди омӯзиши амиқ қарор дода шуд, аз масъалаҳои муҳими иҷтимоии ҷомеаи имрӯза мебошад.

​Раёсати Хадамоти муҳоҷират дар вилояти Хатлон