Бахши Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар ноҳияи Файзобод дар якҷоягӣ бо Мақомоти иҷроияи ҳокимияти давлатии ноҳия, бо иштироки муовини раиси ноҳия Рашидзода Махфират Мансур ва дигар намояндагони мақомоти иҷроияи ҳокимияти давлатӣ дар Ҷамоати деҳоти Қалъаи дашт, дар муассисаи таълимии №25 бо хонандагон, падару модарон, омӯзгорон, фаъолон, муҳоҷирони меҳнатӣ мулоқоти судманд доир намуданд.

Зимни баромад муовини раиси ноҳия – Рашидзода Махфират Мансур оид ба вохӯрии Президенти Ҷумҳурии Тоҷикистон, Асосгузори сулҳу Ваҳдати миллӣ, Пешвои миллат муҳтарам Эмомалӣ Раҳмон, ки рӯзи 9 марти соли 2024 бо фаъолон, намояндагони ҷомеа ва ходимони дини кишвар баргузор гардида буд, суханронӣ намуда, аз ҷумла дар бораи қонунҳои Ҷумҳурии Тоҷикистон “Дар бораи масулияти падару модар дар таълиму тарбияи фарзанд”, “Дар бораи танзими анъана ва ҷашну маросимҳо дар Ҷумҳурии Тоҷикистон”, зиёдаравӣ, сарфаю сариштакорӣ ва босавод гардонидани фарзандон, шароит муҳайё намудан барои таҳсил ва зиндагии онҳо гуфта гузаштанд.

Раҳматуллозода Ф., – мудири бахши САҲШ дар бораи гирифтани шаҳодатномаи таваллуд, никоҳи хешутаборӣ, сини никоҳии духтарон ва номгузории фарзандон ва баланд бардоштани маърифати ҳуқуқӣ шаҳрвандон сухан гуфтанд.

Дар баромади худ мудири бахши Хадамоти муҳоҷират Азизова Б., қайд намуд, ки имрӯз яке аз масъалаҳои муҳим ва ногуворе, ки ҷомеаи ҷаҳонӣ ва ҷумҳурии моро низ ба ташвиш овардааст, терроризм ва ифротгароӣ мебошад. Терроризм ва ифротгароӣ яке аз зуҳуроти номатлуб дар замони имрӯза ба шумор меравад, зеро он боиси ба миён омадани оқибатҳои нохуш – таҳдид ё истифодаи зӯроварӣ, расонидани зарари вазнин, бенизомӣ, тағйири сохти конститутсионӣ дар мамлакат, ғасби ҳокимият ва аз они худ кардани ваколатҳои он, барангехтани низои миллӣ, иҷтимоӣ ва динӣ мебошад.

Бояд қайд намоем, ки донистани забони давлатҳои дигар чи дар дохили ҷумҳурӣ ва дар хориҷи мамлакат зарур мебошад, надонистани забони давлати муҳоҷирпазир боиси саргардонии ҷавонони мо мегардад.

Оиди ҷойҳои кории холӣ барои шаҳрвандони бекор, муҳоҷирони меҳнатие, ки вурудашон ба давлатҳои дигар манъ аст. Дар ширкатҳои сохтмонии Неругоҳи барқии обии Роғун аз тарафи Хадамоти муҳоҷират пешниҳод гардид. Шахсоне, ки хоҳиши кор кардан дар “НБО Роғун” доранд, бо суроғаҳои пешниҳод намуда муроҷиат намоянд.

Раҷабзода О., – мудири бахши кор бо ҷавонон ва варзиш сухан намуда қайд кард, ки моро зарур аст, ки баҳри пойдору устувор нигоҳ доштани сулҳу суботи Ватани азиз ва фароҳам овардани ҷойҳои нави корӣ, бунёди толору майдонҳои варзишӣ ташвиқу тарғиби тарзи ҳаёти солим, гирифтани пеши роҳи қонуншиканӣ, иштироки ҷавонон дар озмунҳои ҷумҳуриявӣ ва сафарбар кардани ҷавонон ба сафи қувваҳои мусаллаҳи Ҷумҳурии Тоҷикистон суханронӣ намуд.

Бахши Хадамоти муҳоҷират дар ноҳияи Файзобод