Тибқи нақшаи чорабиниҳои Хадамоти муҳоҷират дар манотиқи гуногуни ҷумҳурӣ пайваста корҳои ташвиқотию тарғиботӣ роҳандозӣ шуда истодааст. Чунин, як вохӯрии судманд дар Фурудгоҳи байналмилалии шаҳри Душанбе бо иштироки сардори Раёсати Хадамоти муҳоҷират дар шаҳри Душанбе Файзализода Сафаралӣ, ки ба гурӯҳи кории Хадамот шомил аст, бо чанд тан муҳоҷирони меҳнатӣ – шаҳрвандони ҷумҳурӣ, ки тавассути парвоз ба кишвари Россия равонаанд, мулоқот намуд.
Дар суҳбат Файзализода Сафаралӣ, шаҳрвандони ҷумҳуриро бори дигар таъкид намуд, ки пеш аз сафар ба кишвари Россия, худро дар маҳзанаи манъшудагон санҷида баъд ба сафар бароянд ва ҳангоми сафар варақаи баҳисобгирии муҳоҷирати шаҳрвандони Ҷумҳурии Тоҷикистонро тарзи дуруст пур намудани онро аз худ намоянд.
Ҳамзамон пеш аз сафар барои фаъолияти меҳнатӣ ба кишварҳои хориҷа, аз ҷумла Федератсияи Россия, ҳар як шаҳрванд бояд касби муайяне дошта бошад, забони давлатии қабулкунандаро ҳадди ақал бо тарзи муошират донад ва қонунҳои амалкунандаи он кишварро риоя намояд, ки ҳангоми фаъолияташон ба мушкилиҳо дучор нагарданд.
Дар ҷараёни вохӯрӣ сардори Раёсати Хадамоти муҳоҷират дар шаҳри Душанбе оид ба масъалаи пешгирии шомилшавии шаҳрвандон, бахусус муҳоҷирони меҳнатӣ ба ҳаргуна ҳизбу ҳаракатҳои террористӣ экстремистӣ, ҷинояткорию ҳуқуқвайронкунӣ, омӯзиши фарҳанги бегона, таълимоти ғайриқонунии динӣ ва дигар масоили мубрам фикру андешаҳои худро ба ҳозирин иброз намуд.
Мутаассифона, дар рафти суҳбат бо чанд нафар шаҳрвандони мамлакат, ки бо роҳи маъмурӣ аз кишвари Россия берун карда шуда буданд, суҳбат намуда, ба онҳо тавсия дод, ки руҳафтода нашуда ба Раёсати Агентии меҳнат ва шуғли аҳолӣ дар шаҳру ноҳия ва вилоятҳои ҷумҳурӣ муроҷиат намуда дар дохили кишвар соҳиби ҷойи кории холӣ гарданд. Аз ҷумла, онҳо метавонанд дар ширкатҳои сохтмонии ҶСК “НБО Роғун” фаъолияти меҳнатии худро идома диҳанд.
Чунин вохӯриву мулоқотҳо аз ҷониби кормандони Раёсати Хадамоти муҳоҷират дар шаҳри Душанбе бо сокинони пойтахт, шаҳрвандони ҷумҳурӣ дар Фурудгоҳи байналмилалии шаҳри Душанбе ва Истгоҳи роҳи оҳани шаҳри Душанбе мунтазам баргузор хоҳад шуд.
Раёсати Хадамоти муҳоҷират дар шаҳри Душанбе
