Бахши Хадамоти муҳоҷират дар ноҳияи Ёвон якҷоя бо шуъбаи Агентии меҳнат ва шуғли аҳолӣ ва ФМД “МТКТ” – и ноҳия дар Ҷамоати деҳоти Чоргул мулоқоти судманд бо раисони маҳаллаҳо, имомхатибони масҷидҳои панҷвақта, бонувон, ҷавонон ва дигар фаъолони ҳудуди Ҷамоат дар мавзӯи “Таҳдиди ифротгароӣ ба музафариятҳои миллӣ” баргузор намуданд.

Баромадкунандагон қайд карданд, ки мулоқоти Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо фаъолону намояндагони ҷомеа ва ходимони дин имсол дар арафаи моҳи шарифи Рамазон, моҳи покиву соховатмандӣ, парҳезкориву эҳсонкорӣ баргузор гардид.

Асосгузори сулҳу ваҳдати миллӣ – Пешвои тоҷикони ҷаҳон ба масъалаҳои ҷиддиву ҳалталаб ва дар баробари ин муҳимму саривақтӣ, аз қабили терроризму эсктремизм, иҷрои талаботи қонунҳои миллӣ, ҷалби бештари ҷавонон ба таълиму тарбия, ҳифзи арзишҳо ва музафариятҳои миллӣ ва фазои мафкуравии ҷомеа, пайравӣ аз оинҳо ва русуми аҷдодӣ, дар доираи аркони муқаддаси дини мубини ислом фаъолият кардан ва дигар мавзуъҳои ҳаёти маънавию иҷтимоӣ таваҷҷуҳ зоҳир намуда, ҷиҳати амалӣ сохтани дастурҳо ба сохторҳои марбута ва намояндагони ҷомеаву ходимони дин мушаххас додаанд.

Терорризм ва экстремизми диниро яке аз сарчашмаҳои асосии бадбахтии мардум ва гаравидани ҷавонони ноогоҳву аз таҳсили илмҳои муосир дурмонда ҳисобида, иброз доштаанд, ки: “…аксари шахсони ба ҷиноятҳои экстремистиву террористӣ дастзада дар даврони наврасӣ ба таълими ғайриқонунии динӣ ҷалб гардидаанд ва аз таҳсил дар мактаби миёна дур мондаанд.” Ҳамзамон масъалаи хурофотпарастӣ ва нигоҳи кур куронаи бархе аз шаҳрвандон ба арзишҳои инсониву динӣ боиси ба зиёдаравӣ ва хурофоту ифротӣ даст задан мегардад.

Дар мулоқот Президенти мамлакат бори дигар аз сар задани ҷанги таҳмилӣ дар Тоҷикистон, ки солҳои 1990 – ум рух дода буд, ёдовар шуда, сабаби асосии онро дар мафкураи тундрави динӣ, таассубгароӣ ва сиёсисозии ақидаҳои динӣ маънидод намудаанд.

Маҳз истифодаи ғаразноки эҳсоси динии мардум, бетарафию бетафовутӣ нисбат ба тақдири давлат ва миллат боиси сар задани нооромиҳо дар кишвар гардид.

Давлат бо такя ба маълумоти дақиқ чунин ибрози андеша кардаанд:

“Беш аз 150 ҳазор нафар кушташудагон, як миллион гурезаҳои иҷборӣ, зиёда аз 50 ҳазор кӯдакони ятим, миллионҳо нафар одамоне, ки азизони худро аз даст доданд ва миллиардҳо сомонӣ зарари иқтисодии он рӯзҳо ҳанӯз аз хотираи мардум нарафтаанд ва дар иқтисодиёту зиндагии мо имрӯз низ эҳсос мешаванд”.

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба эълон гардидани соли 2024 “Соли маърифати ҳуқуқӣ” андешаронӣ намуда, қабули ин санади меъёрии ҳуқуқиро ба боз ҳам баланд бардоштани маърифати ҳуқуқии шаҳрвандон, таблиғу ташвиқ намудани арзишҳои миллӣ, ҳифзи ҳуқуқу озодиҳои инсон ва шаҳрванд саривақти номид.

Дар робита ба ин, Сарвари давлат ба хиради азалии мардуми тоҷик ва таҳамулпазиру худшинос ва худогоҳ будани онҳо боэътимодии худро иброз доштаанд.

Дар ин бора чунин фармудаанд: “Тарбияи шаҳрвандон дар рӯҳияи эҳтиром нисбат ба қонун ва таъмин намудани волоияти он, ба роҳ мондани усули ҳамкории самараноки давлат ва ниҳодҳои ҷомеаи шаҳрвандӣ дар самти маърифати ҳуқуқии шаҳрвандон аз ҷумлаи ҳадафҳои аслии “Соли маърифати ҳуқуқӣ” мебошад”.

Бо дастур ба мақомоти дахлдори давлатӣ, сохторҳои ҷомеаи шаҳрвандӣ, аҳли ҷомеа, хусусан, ходимони дин зарурияти боло бурдани сатҳи маърифатнокии аҳолии кишварро тақозо доштаанд.

Бояд иброз намуд, ки мулоқоти судманду манфиатбахши Пешвои миллат бо фаъолон, намояндагони аҳли ҷомеа ва ходимони дин давоми мантиқии ҳифзи марзу буми кишвар ва содиқонаву софдилона заҳмат кашиданро аз ҳамагон тақозо кард.

Лозим ба таъкид аст, ки мардуми сарбаланди тоҷик қодир аст, ки дар партави сиёсати сулҳҷуёна ва дурандешонаи Президенти Ҷумҳурии Тоҷикистон муҳтарам Эмомалӣ Раҳмон барои ҳифзи арзишҳои миллӣ, таъмини зиндагии шоиста, суботи кишвар, рушди бемайлони соҳаҳои хоҷагии ҳалқи мамлакат, амалӣ намудани ташаббусҳои созанда, тараннуми ватандӯстиву ватанпарварӣ ва худогоҳии миллӣ боз ҳам бештар саҳм гузошта, обрую эътибори миллату давлатро дар арсаи ҷаҳон болотар бардоранд.

Дар фарҷоми мулоқот фаъолони Ҷамоати деҳоти Чоргул ба саволҳои худ ҷавобҳои мушаххас гирифтанд.

Бахши Хадамоти муҳоҷират дар ноҳияи Ёвон