Дар ҳошияи мулоқоти Президенти Ҷумҳурии Тоҷикистон муҳтарам Эмомалӣ Раҳмон бо фаъолон, намояндагони ҷомеа ва ходимони дини мамлакат, ки 9 марти имсол доир гардид, бо ташаббуси бахши Хадамоти муҳоҷират дар ноҳияи Рӯдакӣ дар якҷоягӣ бо намоянадгони бахши дин танзими анъана ва ҷашну маросимҳо ва раёсати Агентии шуғли аҳолии ноҳия дар деҳаи Ишқободи Ҷамоати деҳоти Эсанбой бо сокинон ва аҳли ҷамоатчигӣ мулоқоти судманд доир шуд.

Зимни баромад иштирокчиён иброз доштанд, ки Сарвари давлат дар мулоқот бо фаъолон, намояндагони ҷомеа ва ходимони дини мамлакат паҳлуҳои гуногуни бархӯрди фарҳангу тамаддунҳо, тафриқаву низоъҳои диниву мазҳабӣ, густариши бесобиқаи ҳодисаҳои марбут ба терроризму экстремизми динии ҷаҳони муосирро, ки имрӯз василаи истифодаи қувваҳои гуногуни манфиатхоҳ гардидаанд, таҳлил намуда, ба ҳифзи истиқлолияти сиёсию фарҳангии Тоҷикистон ва гиромидошти арзишҳову муқаддасоти миллӣ ишора намуданд.

Дар такя ба суханронии Пешвои миллат таъкид гардид, ки ояндаи Тоҷикистон маҳз аз сатҳи маърифати мардум ва пешрафти илму техника вобаста буда, барои ифротӣ нагаштани ҷавонону наврасон таваҷҷуҳи онҳоро бояд бештар ба илму дониш ва касбу ҳунар ҷалб намуд. Ба илмҳои дақиқу риёзӣ диққат дода шуда, техникаву технологияҳои навтарин бояд аз худ шаванд, то сатҳу сифати зиндагии мардумамон баланд гардад.

Дар мулоқот гуфта шуд, ки қонунҳои миллии Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ва «Дар бораи масъулияти падару модар дар таълиму тарбияи фарзанд» қонунҳои одӣ набуда, дар ислоҳоти маънавию иҷтимоии мамлакат ва ташкили фазои мафкуравии озод аз хурофоту таассуб нақши муҳим мебозанд.

Дар анҷоми мулоқот аз раванди корҳои ободониву созандагӣ бахшида ба ҷашни 35-солагии Истиқлоли давлатӣ сухан гуфта, иштирокдорон даъват шуданд, ки дар корҳои ободониву созандагӣ ҷамоати деҳот саҳми арзанда гузоранд.

Бахши Хадамоти муҳоҷират дар ноҳияи Рӯдакӣ