Дар доираи иҷрои нақшаи чорабиниҳои фаҳмондадиҳӣ ва бо мақсади баланд бардоштани сатҳи маърифати сиёсиву иҷтимоии шаҳрвандон, вохӯрии навбатии гурӯҳи кории Мақомоти иҷроияи ҳокимияти давлатии ноҳияи Дарвоз бо сокинони деҳаи Ширги баргузор гардид.
Зимни вохӯрӣ масъалаҳои муҳими рӯз, аз ҷумла сарфакорона истифода бурдани нерӯи барқ, истифодаи мақсаднок ва самараноки қитъаҳои замини наздиҳавлигӣ барои таъмини амнияти озуқаворӣ, баланд бардоштани масъулияти шаҳрвандон дар пешгирии шомилшавии ҷавонон ба ҳизбу ҳаракатҳои ифротӣ ва худдорӣ аз тақлид ба фарҳанги бегона, махсусан дар либоспӯшӣ, мавриди баррасӣ қарор гирифтанд.
Масъулин таъкид намуданд, ки сатҳи маърифати сиёсӣ ва фарҳангии аҳолӣ, хоса насли ҷавон бояд пайваста боло бурда шавад, то ки онҳо тавонанд дар шароити муосир аз арзишҳои миллӣ ва давлатӣ муҳофизат кунанд ва зиракона ба ҳодисаву воқеаҳои ҷаҳони имрӯз муносибат намоянд.
Мудири бахши Хадамоти муҳоҷират Дагиев Зиёратшо ба самъи сокинони ноҳия расонид, ки барои фаъолияти меҳнатӣ дар Федератсияи Россия шаҳрвандони хориҷӣ вазифадоранд, ки мақсади мувофиқи сафари худро нишон диҳанд. Риоя накардани ин талабот метавонад боиси содир шудани қонуншиканӣ гардад.
Ба шаҳрвандони хориҷӣ лозим нест, ки ҳудуди Федератсияи Россияро тарк карда, дубора ворид шаванд. Барои иваз кардани мақсади вуруд ба “меҳнатӣ”, бояд ариза барои гирифтани патент пешниҳод карда шавад ва дар он дар бораи иваз шудани мақсад зикр гардад.
Патент бояд дар муҳлати 30 рӯз пас аз вуруд ба Россия расмӣ гардад — бо ариза ба мақомоти ҳудудии ВКД-и Федератсияи Россия, ФГУП “ПВС” ВКД-и Россия ё МБМ-и “Сахарово” муроҷиат кунед;
Корти нави муҳоҷиратӣ дода намешавад — тағйирот дар пойгоҳи додаҳои ВКД-и Россия сабт мегардад.
Ёдрас мешавем: шаҳрвандоне, ки патент гирифтаанд, уҳдадоранд дар муҳлати 2 моҳ мақомоти ҳудудии ВКД-и Россияро дар бораи оғози фаъолияти меҳнатӣ огоҳ намоянд.
Намояндагӣ бо таъкид тавсия медиҳад, ки тамоми қонунҳо ва қоидаҳои кишвари будубош риоя шаванд ва ҳама ҳуҷҷатҳои зарурӣ сари вақт ба расмият дароварда шаванд.
Ба маълумоти сокинони ноҳия расонида шуд, ки дар ҳолати пайдо шудани саволҳо дар ин самт метавонанд ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ФР оид ба муҳоҷират муроҷиат намоянд.
Бахши Хадамоти муҳоҷират дар ноҳияи Дарвоз
