Дар асоси нақшаи  муштараки воҳидҳои сохтории Мақомоти иҷроияи ҳокимияти давлатии шаҳри Хуҷанд дар самти рушди иҷтимоӣ ва робита бо ҷомеа дар муассисаи таълимии миёнаи умумии №18 дар маҳаллаи «Тути Калон» мулоқоти масъулини шаҳрдорӣ бо иштироки КИ ҲХДТ дар шаҳр, намояндагони шуъбаи Хадамоти муҳоҷират, шуъбаи Агентии меҳнат ва шуғли аҳолӣ, мақомоти ҳифзи ҳуқуқу тартибот бо сокинони маҳаллаи «Тути Калон»  мулоқот намуданд.

Дар мулоқот оид ба пешгирии  ҷавонон, муҳоҷирон аз ҳаргуна корҳои номатлуб, ҷалби ҷавонон ба сафи Қувваҳои Мусаллаҳи Ҷумҳурии Тоҷикистон,  иҷроиши Қонунҳои амалкунанда «Дар бораи масъулияти падару модар дар таълиму тарбияи фарзанд» ва «Дар бораи танзими анъана ва ҷашну маросимҳо», эҳтироми фарҳанги ниёгон, роҳ надодан ба бегонапарастӣ, тарзи дурусти истифодаи шабакаҳои иҷтимоӣ аз тарафи ҷавонон, тақлидкорӣ, сафари ҳаҷи умра, одамрабоӣ, инчунин зиёрати ҳоҷиҳо ва дигар мавзӯъҳои мубрам маърӯзаҳо иброз намуданд.

Мутахассиси пешбари шуъбаи Хадамоти муҳоҷирати шаҳри Хуҷанд оиди   тағйиру иловаҳо ба қонунгузории Федератсияи Россия дар самти муҳоҷирати меҳнатӣ, ҷиҳати будубоши шаҳрвандони Ҷумҳурии Тоҷикистон дар давлати номбурда, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оид ба донистани забони русӣ, таъриху тамаддун

ва асосҳои қонунгузории ин кишвар (тарзи супоридани имтиҳонҳо), доштани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан, гирифтани Патент, тартиб додани шартномаи меҳнатӣ, танҳо бо шиносномаи хориҷӣ ворид шудан дар алоҳидагӣ ба ҳозирин фаҳмонида дод.

Гуфта шуд, ки аз 1-уми январи соли 2015 то инҷониб барои гирифтани Патент бо мақсади дар ҳудуди Россия пешбурди фаъолияти корӣ ҳатман Сертификати тасдиқкунандаи дониши забони русӣ, таърихи Россия ва асосҳои қонунгузории Федератсияи Россия талаб карда  мешавад.

Агар шаҳрванд то соли 1991 дар Тоҷикистон мактаби миёна ё мактаби олиро бо забони русӣ хатм карда бошад он гоҳ тестро дар шакли мухтасар (сӯҳбат) супорида метавонад.

Барои тасдиқи дониши забони русӣ шаҳрванд бояд ҳуҷҷатҳои зерин: аттестат ва диплом пешниҳод намояд.

Муовини  Раиси шаҳри Хуҷанд чорабиниро ҷамъбаст намуда таъкид кард, ки бо назардошти кори дастаҷамъона будани мубориза бар зидди хавфу хатарҳои ҷаҳонӣ ва вабои аср, корҳои фаҳмондадиҳиро пеш аз ҳама, бояд дар маҳаллаҳо ҷоннок кард.

Ҳамзамон чунин як чорабинии навбатӣ дар Ҷамоати деҳоти Ёрии шаҳри Панҷакент бо иштироки муҳоҷирони меҳнатӣ ва аъзои оилаи онҳо ташкил ва баргузор карда шуд.

Раёсати Хадамоти муҳоҷират дар вилояти Суғд