Бо мақсади баланд бардоштани ҳисси ватандӯстӣ миёни наврасону ҷавонон ва арҷгузорӣ ба арзишҳои миллӣ, тибқи нақшаи гурӯҳи кории Мақомоти иҷроияи ҳокимияти давлати ноҳияи Лахш дар деҳаи Заринрӯди ҷамоати деҳоти Лахши боло мулоқоти тарбиявӣ бо волидайн ва хонандагони синфҳои болоӣ баргузор гардид.

Масъулин доир ба мавқеъ ва нақши созандаи ҷавонон дар ҷомеаи муосир суханронӣ намуданд. Зимни мулоқот таъкид гардид, ки дар замони соҳибистиқлолии кишвар, таҳти роҳбарии сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, мақом ва мавқеи ҷавонон дар ҷомеа ба маротиб боло рафта, иштироки онҳо дар корҳои ҷамъиятӣ ва идоракунӣ густариш ёфтааст.

Гуфта шуд, ки имрӯз ҷавонон дар баробари пешбурди корҳои муҳими давлатӣ дар рушди соҳаҳои мухталифи хоҷагии халқ, аз ҷумла илму маориф, иқтисод, фарҳанг ва дигар бахшҳои ҳаётӣ, саҳми назаррас доранд.

Ҳамзамон, аз ҷониби давлату ҳукумат як қатор қонунҳо ва барномаҳо барои дастгирии ҷавонон қабул гардида, бо ташаббуси бевоситаи Пешвои миллат озмунҳои сатҳи ҷумҳуриявӣ чун “Фурӯғи субҳи доноӣ китоб аст”, “Илм — фурӯғи маърифат” ва “Тоҷикистон — Ватани азизи ман” роҳандозӣ шудаанд, ки ҳадафи онҳо дарёфти чеҳраҳои болаёқату соҳибистеъдод ва тарбияи мутахассисони касбӣ мебошад.

Намояндаи Хадамоти муҳоҷират дар ноҳияи Лахш вобаста ба масъалаҳои муҳоҷирати қонунӣ, қоидаҳои будубош дар ҳудуди Федератсияи Россия, тартиби бастани шартномаҳои меҳнатӣ ва риояи меъёрҳои ҳифзи меҳнат ва дигар масъалаҳо вобаста ба самти муҳоҷирати меҳнатӣ суханронӣ намуданд.

Дар интиҳои мулоқот таъкид шуд, ки ҷавонон бояд ба қадри сулҳу суботи кишвар расида, сиёсати созандаи Пешвои миллатро дастгирӣ намоянд ва дар роҳи ободиву тараққиёти Ватани маҳбуби хеш бо ҳисси баланди масъулият саҳм гузоранд.

Маркази матбуоти Хадамоти муҳоҷират