Бурдани корҳои фаҳмондадиҳӣ дар байни шаҳрвандони ҷумҳурӣ-муҳоҷирони меҳнатӣ пеш аз сафар аз ҷониби гурӯҳи кории Хадамоти муҳоҷират ва сохторҳои он дар Фурудгоҳҳои шаҳри Душанбе, Бохтар, Кӯлоб ва Хуҷанд идома дорад.
Бояд тазаккур дод, ки ҳангоми суҳбату мулоқотҳо бо шаҳрвандоне, ки тавассути парвоз ба кишварҳои хориҷа, аз ҷумла Федератсияи Россия сафар мекунанд, кормандони масъули Хадамоти муҳоҷират дар шаҳру вилоятҳо оид ба масъалаҳои тарзи фаъолияти меҳнатӣ, дуруст пур кардани корти муҳоҷират, тартиби расман гирифтани иҷозатнома (патент), муҳлати иҷозатнома, тарзи дароз намудани муҳлати иҷозатнома, арзиши он, гузаштани муоинаи тиббӣ, гирифтани полиси суғуртавӣ, сертификат оид ба донистани забони русӣ, таърих ва асосҳои қонунгузории Федератсияи Россия, тартиби дар қайди ҷойи истиқомат гузоштани шаҳрвандони хориҷа, тарзи бастани шартномаи меҳнатӣ, ҳуқуқ ва уҳдадориҳои корфармо ва коргар маълумоти муфассал пешниҳод мегардад.
Ҳамзамон ба шаҳрвандон – муҳоҷирони меҳнатӣ доир ба истифодаи дурусти шабакаҳои иҷтимоӣ якчанд дастур дода, таъкид намуданд, ки тариқи телефонҳои мобилӣ низ ба гурӯҳҳое, ки оиди дуруст ё нодуруст буданаш маълумот надоранд шинос нашаванд ва фирефтаи нафарони бадхоҳ ва душманони миллат нагарданд.
Инчунин, дар робита ба татбиқи чораҳои пурзӯри амниятӣ дар фурудгоҳҳои байналмилалии Ҷумҳурии Қазоқистон Вазорати корҳои хориҷии Ҷумҳурии Тоҷикистон ба шаҳрвандони Тоҷикистон тавсия медиҳад, ки пеш аз сафар ба Қазоқистон бояд бо худ ҳуҷҷатҳои зарурӣ дошта бошанд.
Аз ҷумла, ҳангоми пурсишу тафтиши кормандони мақомоти сарҳадӣ ва гумрукии Қазоқистон зимни воридшавӣ ба ин кишвар шаҳрвандони Тоҷикистонро зарур аст, ки ба саволҳои марбут ба мақсади сафар, замони бозистодан (будубош), ҷои истиқомат, робитаҳои хешовандӣ ва дӯстӣ доштан бо сокинони Қазоқистон мушаххас ҷавоб дода, ҳангоми зарурат суроғаи истиқоматӣ ва рақамҳои телефони онҳоро барои тамос пешниҳод намоянд.
Ҳамчунин дар сурати дучор гардидан бо мушкилиҳо шаҳрвандони Тоҷикистон бояд ба Сафорати Ҷумҳурии Тоҷикистон дар Ҷумҳурии Қазоқистон (тел: +77761760043 – WhatsApp, tajembastana@mfa.tj) ё Консулгарии генералии Тоҷикистон дар шаҳри Алмато (тел: +77775883115 – WhatsApp, tajconsalmaty@mfa.tj) муроҷиат кунанд.
Дар зимн мавриди таъкид аст, ки байни мақомоти дахлдори Тоҷикистон ва Қазоқистон ҳамкории зич ва созанда идома меёбад.
Бо назардошти ин тавсия дода мешавад, ки ҳангоми дучор гардидан ба ҳар гуна ҳолатҳои шубҳаовар, ба мақомотҳои дахлдори Федератсияи Россия ё Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон, Сафорату Консулгариҳои Ҷумҳурии Тоҷикистон дар Федератсияи Россия, ташкилотҳои ҷамъиятии тоҷикон ва диаспораҳо ҳамкорӣ намоянд.
Дар анҷоми вохӯрӣ ба саволҳои сершумори муҳоҷирони меҳнатӣ ҷавобҳои қаноатбахш дода шуда, ба як қатор шаҳрвандон буклетҳои роҳнамои Вазорати меҳнат, муҳоҷират ва шуғли аҳолӣ оид ба муҳоҷирати бехатар; Тундгаро, экстремист ва террорист киҳоянд ва чаро онро бояд донист? Дар кадом ҳолатҳо шахс ба ҷавобгарӣ кашида мешавад? тақсим гардида, ба муҳоҷирони меҳнатии ба ватан баргашта, барои дарёфти ҷои кор бо музди меҳнати арзанда дар ширкатҳои бузурги дохили кишвар, тавсияҳои муффид дода шуд.
Маркази матуботи Хадамоти муҳоҷират
