Шуъбаи Хадамоти муҳоҷират дар шаҳри Хуҷанд дар якҷоягӣ бо Кумитаи иҷроияи Ҳизби Халқии Демократии Тоҷикистон ҷиҳати шарҳу тавзеҳи Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ дар тамоми ташкилотҳои ибтидоии ҳизбӣ вилоят вохӯриву мулоқотҳо бо аъзоёни фаъоли ҳизб баргузор гардида истодааст.
Ҳамингуна вохӯрӣ дар ташкилоти ибтидоии “Дурахшон” дар назди Филиали Муассисаи давлатии “Маркази ҷумҳуриявии илмии хун” дар вилояти Суғд бо кормандон ва аъзои фаъоли ҳизб гузаронида шуд, ки дар он намояндаи Кумитаи иҷроияи Ҳизби Халқии Демократии Тоҷикистон дар шаҳри Хуҷанд Назокат Юсуфова ва мутахассиси шуъбаи муҳоҷират дар шаҳри Хуҷанд Дилафрӯз Ҷабборова иштирок доштанд.
Раиси ташкилоти ибтидоии мазкур номзади илмҳои тиб Лутфулло Мадумаров маҷлисро ифтитоҳ намуда, мақсади ҷамъомадро ба ҳозирин шарҳ дод.
Сипас, Назокат Юсуфова ва Дилафрӯз Ҷабборова оид ба шарҳу тавзеҳи Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ баромад карда, қайд карданд, ки Паёми Пешвои миллат барои мо сокинони кишвар роҳнамо ба сӯи ояндаи дурухшон ва зиндагии шоиста ба ҳисоб меравад.
Гуфтаҳои Пешвои миллатро ба инобат гирифта, баҳри амалӣ гардонидани ҳар як нуқтаҳои созандаи Паём бояд кӯшиш ба харҷ диҳем ва саҳми арзандаи хешро нисбати ҳаллу фасли муаммоҳои мавҷудаи иқтисодию иҷтимоӣ, боз ҳам ободу зебо намудани ватани аҷдодӣ, устувор гардонидани пояҳои давлатдорӣ ва куллан баланд бардоштани сатҳу сифати зиндагии аҳолӣ гузорем.
Дар ин замина баланд бардоштани ҳисси хештаншиносию ватанпарастии наслҳои ҷавон, бо дасту қалби пок ва нияти соф ба иҷро расонидани уҳдадориҳои хизматии ҳар нафар мо метавонем ба натиҷаҳои дилхоҳ ноил гардида, давлатамонро боз ҳам ободу зебо ва аз ҷиҳати рушди иқтисодию иҷтимоӣ пешрафта гардонида, тамоми муаммоҳои зиндагиро бартараф намоем ва ба наслҳои оянда, як мулки ободро боқӣ гузорем, то ки моро бо некӣ ёд кунанд, – иброз доштанд баромадкунандагон.
Шуъбаи Хадамоти муҳоҷират дар шаҳри Хуҷанд
