Бо ибтикори бахши Хадамоти муҳоҷират дар ноҳияи Рӯдакӣ ҷиҳати пешгирии омилҳои номатлуби ифротӣ вохӯрии навбатӣ бо сокинони ҷамоати деҳоти Эсамбой, аз ҷумла муҳочирони ба Ватан баргашта ва аъзои оилаи онҳо баргузор гардид.

Дар вохӯрӣ намояндагони бахшҳои Хадамоти муҳоҷират, кор бо занон ва оила, оид ба корҳои дин, танзими анъана ва ҷашну маросимҳои миллии мақомоти иҷроияи ҳокимияти давлатӣ дар ноҳияи Рӯдакӣ иштирок доштанд. Дар вохӯрӣ зиёда аз 100 нафар сокинони ҷамоати деҳоти ноҳия ширкат намуданд.

Зимни баргузории вохӯрӣ корҳои иттилоотӣ-маърифатӣ ҷиҳати пешгирии омилҳои номатлуби ифротӣ миёни ҷавонон, аз ҷумла муҳоҷирони меҳнатӣ, инчунин бо мақсади кӯмак ба муҳоҷирони меҳнатие, ки рафтуомадашон ба Федератсияи Россия манъ гардидаасту хоҳиши дар ташкилоту муассисаҳои ноҳия ва пойтахт кор карданро доранд, мехоҳанд дар кишварҳои дигари будубош фаъолият намоянд ё ба соҳибкории хурду миёна ва касбомӯзӣ машғул шаванд, дастрас карда шуд.

Дар баробари ин, варақаҳои иттилоотии “Қоидаҳои нав”, “Роҳхат. Маркази мусоидати ҳуқуқӣ ба муҳоҷирон”, “Тартиби гирифтани патент барои кор дар Федератсияи Россия”, “Тартиби гирифтани иҷозат барои кор ва патент”, “Ёддошт ба муҳоҷирони меҳнатӣ-шаҳрвандони Ҷумҳурии Тоҷикистон, ки ба Федератсияи Россия сафар менамоянд”, “Осуществление трудовой деятельности в Российской Федерации на основании патента: Новые правила”, “Как получить патент для работы в Российской Федерации” ва рӯзномаи “Шуғл ва муҳоҷират” дар байни иштирокчиён тақсим карда шуд.

Дар ин вохӯрӣ корманди масъули бахши Хадамоти муҳоҷират дар ноҳияи Рӯдакӣ оид ба тағйиру иловаҳо дар самти қонунгузории муҳоҷиратии Федератсияи Россия маълумот ва ба саволҳои иштирокчиён посух дод.

Бахши Хадамоти муҳоҷират дар ноҳияи Рӯдакӣ