Бо ибтикориМақомоти иҷроияи ҳокимияти давлатии ноҳияи Файзобод дар толори Муассисаҳои таҳсилоти миёнаи умумии № 40 ва 6 – и ноҳия вохӯрии судманд бо сокинони Ҷамоати деҳоти ба номи Дустмурод Алиев баргузор гардид.
Дар чорабинӣ муовини расии ноҳия, мудири шуъбаи маориф, бахшҳои кор бо ҷавонон ва варзиш, Хадамоти муҳоҷират ва МД “Маркази ташакули тарзи ҳаёти солим” дар ноҳия иштирок ва суханронӣ намуданд.
Баромадкунандагон оид ба шарҳу тавзеҳи Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон “Дар бораи самтҳои асосии сиёсати дохилӣ ва хориҷии ҷумҳурӣ” ибрози андеша ва қайд намуданд, ки бо шарофати соҳибистиқлолии мамлакат Ҷумҳурии Тоҷикистон тавонист ба арсаи ҷаҳонӣ ҳамчун давлати мустақил ворид шуда, дар ҳалли масъалаҳои муҳимтарини сатҳи байналмилалӣ саҳми худро гузорад.
Ҳамин аст, ки имрӯз Истиқлоли давлатии Ҷумҳурии Тоҷикистонро ҷомеаи ҷаҳонӣ эътироф намуда, дар чорабиниҳои зиёди миллии халқи тоҷик намояндагони кишварҳои гуногуни ҷаҳонӣ иштироки фаъолона доранд. Инчунин, оид ба шарҳу тавзеҳи Паёми Президенти Ҷумҳурии Тоҷикистон, дастовардҳои даврони соҳибистиқлолии кишвар, Қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” ва “Дар бораи масъулият барои таълиму тарбияи кӯдак”, риояи одоби шаҳрнишинӣ, пешгирии ҷавонон аз шомилшавӣ ба гурўҳҳои ифротӣ, истифодаи ғайриқонунии барқ ва оқибатҳои он, муҳоҷирати бехатар, ҳифзи арзишҳои миллӣ ва инчунин саҳми сокинон дар корҳои ободониву созандагии ҳудуди шаҳраку маҳалла ибрози андеша намуданд.
Инчунин, дар рафти вохӯрӣ мудири бахши Хадамоти муҳоҷират дар ноҳия Басонат Азизова ба таваҷҷуҳи сокинон расонид, ки вақтҳои охир ҳолатҳои рад кардани вуруд ба қаламрави Федератсияи Россия дар гузаргоҳҳои сарҳадии фурудгоҳҳои шаҳри Москва зиёд гардидаанд. Бо назардошти ин, ба аҳли нишаст, ки зиёди онро муҳоҷирони ба ватан бозгашта ва аъзои оилаи онҳо ташкил медиҳад тавсия дода шуд, ки сафари худро пешакӣ ба нақша гирифта, пеш аз парвоз ҳатман аз замимаи “Госуслуги RuID” барои гузаштан аз бақайдгирии рақамӣ ва пешниҳоди ариза барои сафар ба Россия истифода намоянд.
Ба таваҷҷуҳи сокинон расонида шуд, ки аз 1 июли соли 2026 истифодаи замимаи “Госуслуги RuID” барои бақайдгирии пешакии рақамӣ ҳангоми ворид шудан ба Россия барои шаҳрвандони кишварҳои дорои низоми бераводид ҳатмӣ мегардад. Аз ин рӯ, муҳим аст, ки истифодаи ин хизматрасониро аз ҳозир оғоз намоед, то ҳангоми убури сарҳад аз мушкилоти эҳтимолӣ пешгирӣ карда шавад.
Ҳамчунин тавсия дода шуд, ки пешакӣ ба Намояндагии ХШР ВКД-и Россия дар Ҷумҳурии Тоҷикистон, воқеъ дар шаҳри Душанбе, кӯчаи Айнӣ 121, дар бинои Хадамоти муҳоҷират муроҷиат намоянд. Дар Намояндагӣ шумо метавонед тартиби ҳатмии дактилоскопияро гузаред, инчунин маълумотнома дар бораи мавҷуд ё набудани маҳдудият барои ворид шудан ба Федератсияи Россияро дастрас намоед. Ин иқдом ба шумо имкон медиҳад, ки набудани монеаҳоро пешакӣ санҷида, сафари худро бо итминон бештар ба нақша гиред.
Маркази матбуоти Хадамоти муҳоҷират
