Дар ноҳияи Сангвор бо мақсади шарҳу тавзеҳи Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон вохӯрии саривақтӣ дар Ҷамоати деҳоти Тавилдара бо сокинон, фаъолон ва муҳоҷирони ба ватан бозгашта баргузор гардид.
Зимни суханронӣ маърӯзачиён оид ба муҳтавои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон “Дар бораи самтҳои асосии сиёсати дохилию хориҷии Ҷумҳурии Тоҷикистон” бо сокинон ибрози андеша намуданд. Дар идома баромадкунандагон вобаста ба густариши корҳои ободони, риояи қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”, “Дар бораи масъулияти падару модар дар таълиму тарбияи кӯдак”, “Дар бораи тарбияи ватандӯстии шаҳрвандон”, таблиғу ташвиқи фарҳанги миллӣ, сарфаю сариштакорӣ ва даъвати ҷавонон ба хизмати Ватан ибрози андеша намуданд.
Инчунин, дар рафти вохӯрӣ мудири бахши Хадамоти муҳоҷират дар ноҳия Резвонов Салоҳидин ба таваҷҷуҳи сокинон расонид, ки вақтҳои охир муроҷиатҳои шаҳрвандоне, ки ба феҳристи шахсони назоратшаванда ворид гардидаанд, зиёд шудаанд. Барои ба танзим даровардани вазъи ҳуқуқии худ шаҳрвандони хориҷие, ки дар шаҳри Москва ба қайди муҳоҷиратӣ гирифта шудаанд, метавонанд яке аз роҳҳои зерин истифода баранд: муроҷиати шахсӣ, бо ҳузури шахсӣ ба шуъбаи ҳудудии Сарраёсати ВКД Россия дар шаҳри Москва тибқи маҳалли бақайдгирии муҳоҷиратӣ муроҷиат намуда, вазъи ҳуқуқии худро дар қаламрави Федератсияи Россия ба танзим дароранд. мроҷиати электронӣ, бо роҳи электронӣ тавассути сомонаи расмии 77.мвд.рф, бо интихоби бахши «ҚАБУЛИ МУРОҶИАТҲО», бо замимаи нусхаи ҳуҷҷатҳои тасдиқкунандаи шахсият ва қонунӣ будани будубош дар қаламрави Федератсияи Россия ариза пешниҳод намоянд.
Дар ин ҳолат ҳузури шахсӣ ба шуъбаҳо талаб карда намешавад. Ҷавоб ба суроғаи шумо ба таври фосилавӣ ирсол мегардад. Усули электронии муроҷиат қулай буда, муҳлати баррасии аризаро аз ҷониби шахсони мансабдор кӯтоҳ менамояд. Илова бар ин, аз ҷониби шуъбаҳои масъалаҳои муҳоҷирати шаҳри Москва нуқтаҳои махсуси қабул танҳо барои шаҳрвандони хориҷие, ки дар шаҳри Москва ба қайд гирифта шудаанд, ҷиҳати баррасии масъалаи хориҷ намудан аз феҳристи шахсони таҳти назорат кушода шудаанд.
Маркази матбуоти Хадамоти муҳоҷират
