22 майи соли равон дар толори маҷлисгоҳи Донишгоҳи аграрии Тоҷикистон ба номи Шириншоҳ Шотемур барои шаҳрвандоне, ки барои кори мавсимӣ ба Британияи Кабир сафарбар мешаванд, мусоҳибаи навбатии шаҳрвандон бо намояндагони ширкати HOPS Labour Solutions Ltd оғоз гардид.
Дар мулоқот бо шаҳрвандон, Сардори Хадамоти муҳоҷират Нодирзода Иматшо иштирок дошт, ба он нафароне, ки барои мусоҳиба омодаанд, бори дигар таъкид намуд, ки ҳангоми фаъолияти меҳнатӣ дар кишвари Британияи Кабир қоидаҳои будубош ва муҳлате, ки дар шартнома пешбинӣ гардидааст бояд риоя намуд.
Ҳамзамон Нодирзода Иматшо, қайд намуд, ки ҳамкории ширкати HOPS Labour Solutions Ltd бо МД «Марказҳои машваратӣ ва омодагии пеш аз сафари муҳоҷирони меҳнатӣ» и – Хадамоти муҳоҷират, ки муассисаи давлатӣ аст, хуб ба роҳ монда шудааст. Тибқи тартиб, чунин хизматрасониҳо комилан ройгон буда, аз шаҳрвандон маблағ талаб карда намешавад.
Сипас, намояндаи ширкати номбурда Димчо Усурский баромад намуда, муфассал барномаи ширкатро, ки аслан бо корҳои мавсимӣ – кишоварзӣ машғуланд, аз ҷумла ҷамъоварии сабзавот ва мевагӣ маълумот пешниҳод намуд. Ба иштирокчиён оид ба рӯзи соати корӣ, пардохти маош, ҷойи зист ва дигар шароити фаъолияти меҳнатӣ маълумот пешкаш гардид.
Бояд гуфт, дар феҳрасти талабот аз муҳоҷирон донистани забони англисӣ дар сатҳи муошират, саломатии бардавом зикр шудааст. Муҳлати сафар то 6 моҳ, хароҷоти сафар аз сӯи худи муҳоҷирон пардохт мегардад.
Дар фарҷом, намояндаи ширкат ба саволҳои сершумори шаҳрвандон, ҷавобҳои қаноатманд дод.
Ба маълумоти Шумо расониданием, ки мусоҳиба бо шаҳрвандон, ки номнавис шудаанд, аз ҷониби ширкати HOPS Labour Solutions Ltd се рӯз идома хоҳад кард.
Маркази матбуоти Хадамоти муҳоҷират
