14 октябри соли равон директори ширкати сохтмонии Ҷумҳурии Черногория “INVESTEAM Construction company” Milos Jovanovic ба Хадамоти муҳоҷират ташриф овард.
Зимни боздид, тарафҳо доир ба масъалаҳои муҳоҷирони меҳнатӣ мубодилаи афкор намуда, роҷеъ ба масъалаи интиқоли қувваи корӣ – шаҳрвандони ҷумҳурӣ ба ширкати болозикр мубодилаи афкор оростанд.
Дар рафти вохӯрӣ директори ширкати сохтмонии Ҷумҳурии Черногория “INVESTEAM Construction company” Milos Jovanovic муфассал дар бораи фаъолияти ширкат маълумот пешниҳод намуда, қайд кард, ки ширкати мазкур бо корҳои сохтмонӣ дар ҳудуди Ҷумҳурии Черногория машғул мебошад. Айни замон, ширкат омодааст, ки 300 нафар шаҳрвандони Ҷумҳурии Тоҷикистонро барои фаъолият дар соҳаи сохтмонӣ дар Ҷумҳурии Черногория муташаккилона ҷалб намояд.
Ҳамзамон Milos Jovanovic иброз намуд, ки роҳбарияти ширкат барои бехатарии муҳоҷирони тоҷик кафолат медиҳад. Коргарон бо маоши хуб, ҷойи хоби бе пул ва ду вақт бо хӯрока таъмин мегарданд.
Хотиррасон мекунем, ки барои фаъолият дар ширкати мазкур танҳо шахсони соҳибкасб, ки тахассуси сохтмончӣ доранд ба кор қабул карда мешавад. Инчунин, роҳикро аз ҷониби шаҳрванд пардохт карда мешавад.
Дар навбати худ Сардори Хадамоти муҳоҷират Нодирзода Иматшо оиди фаъолияти Хадамоти муҳоҷират, аз ҷумла Муассисаи давлатии “Марказҳои машвартӣ ва омодагии пеш аз сафари муҳоҷирони меҳнатӣ” дар шаҳрҳои Душанбе, Бохтар, Хуҷанд ва Хоруғ маълумот пешниҳод намуд.
Қайд карданд, ки самтҳои асосии Марказҳо ин омода намудани муҳоҷирони меҳнатӣ пеш аз сафар ба хориҷӣ кишвар, барои муташаккилона сафарбар кардани қувваи корӣ ба хориҷа, имзо расонидани Созишномаҳои ҳамкорӣ бо ташкилоту муассисаҳои кордиҳанда, омӯзиши забонҳои хориҷа, аз ҷумла, англисӣ ва кореягӣ, ки ройгон ба роҳ монда шудааст. Дар умумият осон намудани мушкилоти муҳоҷири меҳнатӣ ва ба он кӯмак расонидан мебошад.
Дар фарҷом Созишномаи ҳамкорӣ байни Хадамоти муҳоҷират ва ширкати “INVESTEAM Construction company” – и Ҷумҳурии Черногория ба имзо расонида шуд.
Вохӯрӣ дар фазои дӯстона ва ҳусни тафоҳум баргузор гардид.
Маркази матбуоти Хадамоти муҳоҷират
