Бо ташаббуси бахши Хадамоти муҳоҷират дар ноҳияи Темурмалик суҳбати самимӣ дар атрофи қонунгузории кишвари қабулкунанда бо аҳли Ҷамоати деҳоти С. Раҳимови ноҳия баргузор гардид.
Дар он мудири бахши Хадамоти муҳоҷират дар ноҳия, кормандони Ҷамоати деҳот, раисони маҳаллаҳо, муҳоҷирони меҳнатӣ ва аҳли оилаи онҳо иштирок намуданд.
Зимни баромад мудири бахши Хадамоти муҳоҷират дар ноҳия Баҳодур Сафаров оид ба қонунгузориҳои нави кишвари қабулкунанда, дар бораи тартиби ба қайд гузоштан, омода будан барои гирифтани Сертификати донистани забони русӣ, таърих ва қонунгузории кишвари қабулкунанда, Патент, бастани шартномаи меҳнатӣ бо кордиҳанда, инчунин дар бораи шомил нашудани ҷавонон ба гурўҳҳои ифротгаро ва дигар масъалаҳои мубрами рӯз суханронӣ намуд.
Ҳамзамон ӯ таъкид намуд, ки мувофиқи талаботи нави қонунгузориҳои Федератсияи Россия дар самти муҳоҷирати меҳнатӣ, ҳар шаҳрванди хориҷие, ки дар ҳудуди кишвари Россия фаъолият менамояд уҳдадор аст, дар давоми 30 – рӯз аз лаҳзаи воридшавиаш патентро дастрас намояд, агар дар ин муддат ӯ ин амалро иҷро накунад, бояд ҷарима супорад ё қаламрави онро тарк намояд.
Махсус қайд карда шуд, ки зимнан, шаҳрвандон танҳо баъд аз 90 – рӯзи аз санаи хориҷшавиашон аз ҳудуди Федератсияи Россия, ҳуқуқи дигарбора бозгашт ба ин кишвар барои фаъолияти меҳнатӣ доранд.
Аз ин лиҳоз, шаҳрвандоне, ки хоҳиши фаъолияти меҳнатӣ дар Федератсияи Россия доранд, бояд хуб омода шуда, баъд ба сафар бароянд. Шахсоне, ки мехоҳанд аз қонунгузориҳои кишвари қабулкунанда Россия огоҳ бошанд, ҳатман ба бахши Хадамоти муҳоҷират дар ноҳия муроҷиат намоянд.
Дар суҳбат бори дигар таъкид гардид, ки барои дастрас намудани Патент ҷиҳати ишғоли ҷойҳои корӣ дар ҳудуди Федератсияи Россия барои шаҳрвандони хориҷӣ санҷиши донистани забони русӣ, таърих ва асосҳои қонунгузории Федератсияи Россия ба роҳ монда шудааст. Яъне, шаҳрвандони хориҷӣ танҳо баъд аз дастрас намудани Сертификати санҷиш дар Федератсияи Россия ба кор қабул карда мешаванд.
Дар фарҷом сокинони Ҷамоати деҳот ба саволҳои худ ҷавобҳои мушаххас гирифта, ба онҳо буклетҳо доир ба қонунгузориҳои нави Федератсияи Россия дар самти муҳоҷирати меҳнатӣ тақсим карда шуд.
Бахши Хадамоти муҳоҷират дар ноҳияи Темурмалик
