Бо ташаббуси Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе якҷоя бо бахши Хадамоти муҳоҷират дар ноҳияи Ёвон суҳбати самимӣ дар атрофи қонунгузории кишвари қабулкунанда бо сокинони ноҳия баргузор намуданд.

Дар рафти мулоқот бо сокинон доир ба мавзўи муҳоҷирати бехатар, пешгирӣ ва мубориза бо экстремизму терроризм, ворид гардидани ҷавонон ба ҳизбу ҳаракатҳои ифротгаро, бемориҳои гузаранда, аз ҷумла ВНМО бахшида шуд.

Зимни вохӯрӣ директори МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе Акбаров Хуҷаназар ба ҳозирин оид ба қоидаҳои муҳоҷирати бехатар ва меъёрҳои қонунгузории Федератсияи Россия вобаста ба муҳоҷират, инчунин, оид ба хатарҳои ҷаҳони муосир маълумот дода, аз шаҳрвандон даъват ба амал овард, ки ҳаргиз фирефтаи иғвою дасисаҳои душманону бадхоҳони миллат нашаванд ва ҳушёриву зиракии сиёсиро аз даст надиҳанд.

Ҳамзамон, ӯ таъкид намуд, ки мувофиқи талаботи нави қонунгузориҳои Федератсияи Россия дар самти муҳоҷирати меҳнатӣ,  ҳар шаҳрванди хориҷие, ки дар ҳудуди кишвари Россия фаъолият менамояд уҳдадор аст, дар давоми 30 – рӯз аз лаҳзаи воридшавиаш Патентро дастрас намояд, агар дар ин муддат ӯ ин амалро иҷро накунад, бояд ҷарима супорад ё қаламрави онро тарк намояд.

Махсус қайд карда шуд, ки зимнан, шаҳрвандон танҳо баъд аз 90 – рӯзи аз санаи хориҷшавиашон аз ҳудуди Федератсияи Россия, ҳуқуқи дигарбора бозгашт ба ин кишвар барои фаъолияти меҳнатӣ доранд.

Аз ин лиҳоз, шаҳрвандоне, ки хоҳиши фаъолияти меҳнатӣ дар Федератсияи Россия доранд, бояд хуб омода шуда, баъд ба сафар бароянд.

Шахсоне, ки мехоҳанд аз қонунгузориҳои кишвари қабулкунанда Россия огоҳ бошанд, ҳатман ба Хадамоти муҳоҷират ва зерсохторҳои онҳо дар шаҳру ноҳияҳои ҷумҳурӣ муроҷиат намоянд.

Инчунин, ӯ иброз намуд, ки Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳрҳои Душанбе, Бохтар, Хуҷанд ва Хоруғ омодаанд, як гурўҳ шаҳрвандони мамлакатро, ки соҳибкасб мебошанд, бо ҷойи кор берун аз ҷумҳурӣ, аз ҷумла дар ширкатҳои Федератсияи Россия, Аврупо ва халиҷи Форс таъмин намояд.

Шахсоне, ки ба ин Марказҳо муроҷиат мекунанд, ҳамаи ҳуҷҷатгузориҳо ройгон сурат мегирад.

Ҳамзамон ба ҳозирин рўйхати ҷойҳои холии корӣ дар ширкатҳои сохтмонии НБО “Роғун” бо номгўи пурраи ихтисосҳо, шароити корӣ, меъёри музди меҳнат, талаботи корфармо пешниҳод карда шуд.

Дар фарҷом сокинони ноҳия ба саволҳои худ ҷавобҳои мушаххас гирифта, ба онҳо буклетҳо доир ба қонунгузориҳои нави Федератсияи Россия дар самти муҳоҷирати меҳнатӣ, аз ҷумла буклетҳо бо мазмуни: “Мо бар зидди терроризм ва экстремизм (ифротгароӣ)” бо забони тоҷикӣ супорида шуд.

МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе