Суҳбату вохӯриҳои судманд бо сокинони ҷамоати деҳоти Деҳқонобод деҳаи Бобосафоли ноҳияи Фархор бо иштироки кормандони Марказҳои саломатии ноҳия ва сокиноне, ки фарзандонашон дар муҳоҷирати меҳнатӣ қарор доранд вобаста ба вируси норасои одам (ВНМО) ва бемории сил баргузор гардид.
Дар рафти чорабинӣ роҳбари Маркази пешгирӣ ва мубориза бар зидди бемории (ВНМО)-и ноҳия Бобозода Р., дар баромади худ, доир ба пайдоиши бемории сироятии ВНМО ва роҳҳои сироятёбии он ибрози назар намуд. Зикр шуд, ки Дар Ҷумҳурии Тоҷикистон Қонун “Дар бораи муқовимат бо Вируси норасоии масунияти одам ва Бемории пайдошудаи норасоии масуният” аз 28 декабри соли 2005 қабул гардидааст. Қонуни мазкур асосҳои ҳуқуқии амалӣ намудани маҷмўи чорабиниҳои муқовимат ба паҳншавии Вируси норасоии масунияти одам ва Бемории пайдошудаи норасоии масуниятро танзим менамояд. Он ҷиҳати пешгирии паҳншавии сироятпазирии Вируси норасоии масунияти одам, кам кардани таъсири мубталошавӣ ба беморӣ, расонидани ёрии тахассусии тиббӣ ба шахсони мубталои Вируси норасоии масунияти одам ва Бемории пайдошудаи норасоии масуният ва сабук гардонидани оқибати он барои ҳар кас ва тамоми ҷомеа нигаронда шудааст.
Зимни мулоқот бо сокинон суҳбати ошкоро барпо гардида, оид ба сабабҳои сар задани бемории ВНМО маълумотҳои мушаххас оварда шуд. Таъкид рафт, ки вируси норасоии масунияти одам ва Бемории пайдошудаи норасоии масуният (ВНМО/БПНМ) давоми 40 соли охир ба мушкилии асосии аҳли сайёра табдил ёфтааст.
Аз ҷумла, иброз гардид, ки дар байни муҳоҷирони меҳнатии ба ватан бозгашта ва аъзои оилаи онҳо баргузор намудани корҳои иттилоотиву фаҳмондадиҳӣ айни муддао буда, муҳоҷироне, ки ба ватан баргаштанд, ҳатман аз муолиҷаи тиббӣ гузаранд.
Мақсади асосии ин чорабинӣ пеш аз ҳама, баланд бардоштани сифати хизматрасонӣ дар афзоиши дастрасӣ ба табобати зидди ретровирусӣ барои шахсоне, ки бо ВНМО зиндагонӣ мекунанд (ШВЗ) мебошад.
Барои муайн кардани мавҷудияти ВНМО аз таҳлили хун гузаштан лозим аст. Бояд қайд кард, ки як маротиба аз таҳлили хун гузаштан кифоя нест. ВНМО хусусияти муҳиме дорад – 3-6 моҳи аввал баъд аз сироят ёфтан аз таҳлили хун гузаштан мавҷудияти ВНМО дар хун муайян карда намешавад, ҳарчанд ки шахси сироятёфта дар ин муддат аллакай чандин нафаронро мубталои ин беморӣ гардонидааст. Барои ҳамин, бори дигар, такроран баъди 3-6 моҳ аз таҳлили хун гузаштан зарур мебошад.
Дар итмоми чорабинӣ байни иштирокчиён маводҳои иттилоотӣ пешгирикунанда (рифола) тақсим карда шуд.
Раёсати Хадамоти муҳоҷират дар вилояти Хатлон
