Дар асоси Нақшаи чорабиниҳои тасдиқгардидаи гурӯҳи кории Мақомоти иҷроияи ҳокимияти давлатии ноҳияи Шаҳринав, ки дар он бахши Хадамоти муҳоҷират шомил аст, дар Ҷамоати деҳоти Чуст бо сокинон, фаъолон, муҳоҷирони ба ватан бозгаша ва аъзои оила онҳо вохӯрии судманд баргузор гардид.
Маврид ба зикр аст, ки ҳадафи вохӯриҳо, шарҳу тавзеҳи Паёми Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ, ки санаи 28 декабри соли 2024 ироа гардида буд, мебошад.
Зимни чорабинӣ ҳамзамон муҳтавои қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”, “Дар бораи масъулият барои таълиму тарбияи кӯдак”, ки дар таҳрири нав қабул гардидааст, ёдрас карда шуданд.
Ҳамзамон таваҷҷуҳи сокинон ба масъалаҳои дигар аз қабили пешгирии шомилшавии ҷавонон ба ҳизбу ҳаракатҳои экстремистию террористӣ, муҳоҷирати бехатар, қонунҳои нави кишвари Россия дар самти муҳоҷирати меҳнатӣ, пешгирии фарҳанги бегона, ҳифзи тозагии муҳити зист, пешгирии ҷудошавии оилаҳои ҷавон, иҷрои корҳои ободониву созандагӣ бахшида ба истиқболи 35- солагии Истиқлоли давлатии Ҷумҳурии Тоҷикистон, таълиму тарбияи насли наврас дар рӯҳияи хештаншиносию ватандӯстӣ, даъвати ҷавонон ба сафи Қувваҳои Мусаллаҳи Ҷумҳурии Тоҷикистон, ҷалб гардиданд.
Инчунин, дар вохӯрӣ доир ба вазъи ҷаҳони муосир, огоҳ будан аз равандҳои гуногун, пешгирии зӯроварӣ дар оила, никоҳи бармаҳал, пешгирӣ аз бемориҳои сироятӣ, тозаву озода нигоҳ доштани маҳалли зист, самаранок истифода бурдани қувваи барқ ва заминҳои наздиҳавлигӣ, тарзи дурусти истифодаи телефони мобилӣ, одоби муошират, корбарии дуруст дар сомонаҳои иҷтимоӣ, ҳимояи аслияти тоҷикӣ, ҷалби насли наврас ба забономӯзӣ, муносибати хуб бо табиат, ҳимояи манфиатҳои миллӣ, ифтихор аз ташаббусҳои ҷаҳонии Пешвои миллат, ҳурмати падару модар ва калонсолон фикру андешаҳо баён гардиданд.
Мудири бахши Хадамоти муҳоҷират дар ноҳия Ҷаборзода Расул, таваҷҷуҳи сокинонро, ки аз ноҳия дар муҳоҷирати меҳнатӣ қарор доранд, ба он ҷалб намуд, ки аз 5 феврали соли 2025 нисбати шаҳрвандони хориҷӣ, ки ғайриқонунӣ дар ҳудуди Федератсияи Россия қарор доранд, раванди ихроҷи онҳо амалӣ шуда истодааст.
Дар асоси Фармони Президенти Федератсияи Россия аз 30 декабри соли 2024, № 1126 шаҳрвандони хориҷие, ки дар Феҳристи шахсони назоратшаванда қарор доранд, метавонанд то 30 апрели соли 2025 вазъи ҳуқуқии худро ба танзим дароранд.Дар охир ба саволу дархостҳои сокинон посухҳои қонеъкунанда манзур карда шуданд. Мулоқоту вохӯриҳо дар ин самт идома доранд.
Бахши Хадамоти муҳоҷират дар ноҳияи Шаҳринав
