Кормандони шуъбаи баҳисобгирӣ ва хизматрасонӣ ба муҳоҷирон дар “Фурудгоҳи байналмилалии шаҳри Душанбе” ва «Истгоҳи роҳи оҳани шаҳри Душанбе”- и Раёсати Хадамоти муҳоҷират дар шаҳри Душанбе корҳои иттилоотӣ – маърифатиро бо муҳоҷирони меҳнатӣ, вобаста ба ворид гардидани тағйирот ба қонунгузории нави Федератсияи Россия дар самти муҳоҷирати меҳнатӣ тақвият бахшида, тибқи нақша – чорабиниҳои Раёсат бо шаҳрвандон дар фурудгоҳ ҳамарӯза вохӯриҳо мегузаронанд.

Бояд тазаккур дод, ки шуъба фаъолияти худро мутобиқи Қонуни Ҷумҳурии Тоҷикистон, фармонҳо ва дастуру супоришҳои Пешвои миллат, қонунҳо ва қарорҳои Ҳукумати Ҷумҳурии Тоҷикистон, Низомнома ва Нақшаи кории Хадамоти муҳоҷират ва дигар санадҳои меъёрии ҳуқуқии танзимкунандаи раванди муҳоҷирати аҳолӣ ба роҳ мондааст.

Дар суҳбат бо муҳоҷирони меҳнатӣ, ки азми сафари кишвари Россия доранд, оид ба талаботҳои нави қонунгузории Федератсияи Россия дар самти муҳоҷирати меҳнатӣ сухан гуфта, тартиб ва мақсади воридшавӣ, дар муҳлати муқаррар гардида, ҷамъоварӣ ва пешниҳод намудани маводи зарурӣ ба ВКД ФР оид ба муҳоҷирати минтақавӣ барои гирифтани патент ва риояи муҳлати будубоши муваққатии шаҳрвандони хориҷӣ ва ба вуҷуд омадани мушкилиҳои эҳтимолӣ барои шаҳрвандони Ҷумҳурии Тоҷикистон, ки хоҳиши фаъолияти меҳнатиро дар қаламрави ин давлат доранд, пеш меояд, ошно намуда, роҳҳои ҳалли онро низ ба онҳо ба таври содда фаҳмонда дода, ба саволҳои онҳо ҷавобҳои мушаххас доданд.

Ҳамзамон таъкид карда шуд, ки Вазорати корҳои дохилии Федератсияи Россия аз 01.01.2023 дар бахши баҳисобгирии муҳоҷират ва бақайдгирии макони зист барои шаҳрвандони хориҷӣ ва шахсони бешаҳрвандӣ як қатор тағийроти навро ҷорӣ кард.

Аз он ҷумла, аз 01.01.2023 варақаҳо (бланкаҳо) барои бақайдгирии шаҳрванди хориҷӣ бо дарназардошти маълумот дар бораи гирифтани изи ангуштон – дактилоскопия ҷорӣ мешаванд.

Ҳамакнун дактилоскопия бевосита дар нуқтаҳои тафтиши шиноснома гузаронида мешавад.

Шаҳрвандони Ҷумҳурии Тоҷикистон, ки ҳамин ҳоло дар ФР қарор доранд, бояд ин корро то охири моҳи январ анҷом диҳанд.
Шаҳрвандони хориҷӣ бояд на дертар аз 90 рӯз пас аз вуруд ба қаламрави ФР изи ангуштонашро супоранд.

Бланкаҳои навро барои пур кардан метавон аз сомонаҳои Раёсат оид масоили муҳоҷират ва ВКД дастрас намуд.

Дар баробари ин, ба ҳар як шаҳрванд буклету варақаҳои иттилоотӣ “Тартиби гирифтани патент барои кор дар Федератсияи Россия”, “Памятка трудовому мигранту-гражданину Республики Таджикистан, выезжающему в Российскую Федерацию”, “Как получить патент для работы в Российской Федерации”, “Мо бар зидди терроризм ва экстремизм (ифротгароӣ)”, “Ҳуқуқҳои муҳоҷирон, барои гирифтани кӯмак дар Федератсияи Россия ба куҷо муроҷиат карда метавонед?”, “Чӣ тавр мақоми ҳуқуқии худро оид ба мавҷудияти асос барои манъи вуруд ба Федератсияи Россия санҷидан мумкин аст?”, “11 марҳила оид ба қабули қарори дуруст барои сафар намудан ба муҳоҷирати меҳнатӣ” супорида шуд.

Кор дар ин самт идома дорад.

Раёсати Хадамоти муҳоҷират дар шаҳри Душанбе