Тақвият додани корҳои фаҳмондадиҳӣ дар байни муҳоҷирони меҳнатӣ, вобаста ба муҳоҷиратӣ бехатар, пешгирии пайвастани муҳоҷирон ба сафи гурӯҳҳои ифротгароии динӣ, савдои одамон ва қонунҳои нави Федератсияи Россия дар самти муҳоҷират, аз ҷониби кормандони масъули шуъбаи Хадамоти муҳоҷират дар “Фурудгоҳи байналмилалии Кӯлоб” пайваста идома дорад.
Дар рафти вохӯрӣ бо шаҳрвандон, мутахассиси пешбари шуъбаи Хадамоти муҳоҷират дар шаҳри Кўлоб Сафаров Абдулфайз доир ба тағйиру иловаҳо ба қонунгузории Федератсияи Россия дар самти муҳоҷирати меҳнатӣ, будубоши шаҳрвандони Ҷумҳурии Тоҷикистон дар давлати номбурда, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оид ба донистани забони русӣ, таъриху тамадун ва асосҳои қонунгузории ин кишвар, доштани касби мувофиқ ва ҳуҷҷати тасдиқкунандаи он, корти муҳоҷиратӣ, дар қайди муҳоҷират истодан, гирифтани Патент, тарзи бастани шартномаи меҳнатӣ, ҳуқуқ ва уҳдадориҳои корфармо ва коргар фаҳмонида шуд.
Ҳамзамон, ба таваҷҷуҳи шаҳрвандони Ҷумҳурии Тоҷикистон расонида шуд, ки ҳангоми сафар ба Федератсияи Россия ё зимни бозгашт ба Ватан дар фурудгоҳҳо аз шахсони ношинос бағоҷ, ҳуҷҷат ва дигар ашёҳое, ки таркибаш муайян нест, барои интиқол додан ба кишвари дигар қабул накунанд.Аз шаҳрвандони Ҷумҳурии Тоҷикистон, муҳоҷирони меҳнатӣ хоҳиш карда мешавад, ки аз интиқоли ашёҳои иҷозаташон мамнуъ ва истифодаашон ғайри қонунӣ аз дасти шахсони ношинос худдорӣ намоед.
Дар ҳолати пайдо гардидани саволҳо дар самти муҳоҷирати меҳнатӣ ҷиҳати гирифтани маълумоти ҳуқуқии ройгон дар кишвари иқомат шаҳрвандон метавонанд ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия оид ба муҳоҷират бо рақамҳои +7 (495) 967-98-44 ва шабакаи иҷтимоии “WhatsApp” +7 (999) 912-58-68 муроҷиат намоянд. Дар охир аз ҷониби намояндаи шуъбаи Хадамоти муҳоҷират ба мусофирон брошюраҳои роҳнамои пеш аз сафар оид ба фаъолияти меҳнатӣ дар каламрави Федератсияи Россия ва қоидаҳои нави ин кишвар дар самти муҳоҷират тақсим карда шуд.
Раёсати Хадамоти муҳоҷират дар вилояти Хатлон
