Яке аз масъалаҳои ҳассосу даҳшатангезе, ки боиси ташвиши ҷомеаи ҷаҳонӣ гардидааст, ин паҳншавии босуръати терроризму экстремизм аст. Ифротгароӣ имрӯз ҳамчун ҷинояти байналмилалӣ доман паҳн намуда, тамоми марзҳоро убур карда истодааст.

Имрӯз авзои кунунии минтақа ва ҷаҳон роҳҳои пурзӯр намудани муборизаи беамон алайҳи терроризму экстремизм, ҳизбу ҳаракатҳои мамнӯъ ва дигар таҳдидҳоро тақозо дорад. Масъалаҳо ҷиҳати андешидани тадбирҳои мушаххас бобати таъмини амният, пешгирӣ аз фаъолияти унсурҳои терроризму экстремизм, миллатпарастии иртиҷоӣ ва роҳ надодан ба бетартибиҳои оммавӣ аз вазифаҳои муҳими айём маҳсуб меёбад. Сарфи назар аз тадбирҳои солҳои охир андешидашуда дар бахши мубориза бо терроризм, таҳдиди амалҳои нави террористӣ нафақат аз байн нарафтааст, балки теъдодан афзунӣ дорад. Дар гӯшаҳои гуногуни ҷаҳон фаъолшавии созмонҳои террористӣ ва ташкилоту созмонҳои маблағгузори онҳо ба мушоҳида мерасад.

Гурӯҳҳои ифротгаро бештар ҷавононро, ки дар берун аз марзи ҷумҳурӣ иқомат мекунанд ва бо сабаби надоштани даромади муносиб бо пешниҳоди «ба даст овардани пули хуб» фирефта намуда, ба доми макри худ кашидан мехоҳанд. Дар замони муосир экстремизм ва терроризм хусусияти байналмилалӣ дошта, барои ин гуна зуҳурот сарҳади байнидавлатӣ, миллат ва дин, муқаддасоти дигар низ вуҷуд надорад.

Боиси таассуф аст, ки дар ҷумҳурии мо солҳои охир бархе ҷавонон бо шомил шудан ба ҳизбҳои ифротию гурӯҳҳои террористӣ дастгир ва бо моддаҳои гуногуни қонуни ҷиноӣ айбдор шудаанд.

Шахсан мо ҷонибдори сулҳу амонӣ ва оромию тинҷии кишварамон буда, ҳеҷ вақт аз тасмими ин ҷавонони гумроҳзада дастгирӣ нахоҳем кард. Ба ҷавонон таъкид мекунем, ки фирефтаи афкори бегонагон нагардед, ба ҳар гуна ҳизбу ҳаракатҳои иртиҷоӣ напайвандед, зиндагии худ ва аҳли хонаводаатонро ҳаргиз тираву тор нагардонед.

Истиқлоли давлатии Тоҷикистон муҳимтарин дастоварди миллати мо дар тӯли ҳазор соли охир аст, ки ҳифзу гиромидошти он қарзи шаҳрвандии мост. Аз ин рӯ, вазъи мураккаби сиёсии ҷаҳони муосир аз мо беш аз ҳарвақта ҳушёрии сиёсиро тақозо менамояд.

Хатлони Парвиз,
муовини директори МД «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе