13 ноябр бо ташаббуси МД “Марказҳои машваратӣ ва омодагӣ пеш аз сафари муҳоҷирони меҳнатӣ”- дар шаҳри Душанбе якҷоя бо Намояндагии дафтари Созмони байналмилалии муҳоҷират (СБМ) дар Тоҷикистон дар доираи лоиҳаи “Муҳоҷирати бехатар” барои баланд бардоштани сатҳи огоҳии муҳоҷирони меҳнатӣ дар меҳмонхонаи “Ҳаят Реҷенсӣ” тренинг барпо гардид, ки зимни он муҳоҷирони меҳнатӣ ва намояндагони Марказ ширкат варзиданд.
Зимни тренинг маълум шуд, ки аксарияти ҷамъомадагон дар муҳоҷирати меҳнатӣ ба мушкилоти гуногун рӯ ба рӯ шуда, аз ноилоҷӣ дидаю дониста фаъолияташонро берун аз Ватан идома дода истодаанд.
Ҳамзамон коршиносон доир ба омодагӣ пеш аз сафар, тартиби ҳуҷҷатгузорӣ барои барасмиятдарории фаъолияти кории худ дар хориҷи кишвар, рақобатпазирӣ дар бозори меҳнат ва қонунҳои амалкундаи кишварҳои қабулкунандаи муҳоҷират суҳбат намуда, ба иштирокчиён маслиҳатҳои муфид ва маълумотҳои мушаххас доданд.
Аз ҷумла, қайд гардид, ки муҳоҷир пеш аз сафар бояд давлати интихоб кардаашро хуб омухта, аз забон, қонун, қоидаҳо ва урфу одати он бохабар бошад. Инчунин дақиқ намояд, ки дар куҷо метавонад ҷойи корӣ хуб пайдо кунад ва дар сурати ба вуқуъ пайвастани ҳолатҳои ногувор шинос ё наздикон метавонад дар муддати аввал то ёфтани ҷойи кор ва ҷойи хоб ба ӯ кумак расонанд.
Танҳо дар сурати андешидани чораҳои зарурӣ вобаста ба ин ҳолатҳо сафари муҳоҷирро то андозае бехатар ҳисобидан мумкин аст.
Имрӯзҳо, муҳоҷират ба як раванди умумибашарӣ табдил ёфта, ҳамасола аз кишвари мо низ ҳазорон нафар одамон бо мақсади дарёфти ҷойи кору манбаи даромад ва беҳтар кардани шароити зиндагии худ ва аҳли оилаашон ба давлатҳои дигар ба муҳоҷирати меҳнатӣ равона мегарданд.
Мутаассифона, баъзе аз муҳоҷирони меҳнатӣ бо сабаби надоштани иттилооти зарурӣ дар бораи муҳоҷирати қонунӣ барои пайдо кардани кор дар хориҷа душворӣ мекашанд. Баъзан кор ёбанд ҳам, музди меҳнати худро гирифта натавониста, ба доми қаллобон меафтанд ва ё ба ғуломии меҳнатӣ гирифтор шуда, ранҷу азоби зиёде мекашанд.
Барои пешгирии чунин хатарҳои муҳоҷират ҳар як шахсе, ки мехоҳад ба муҳоҷирати меҳнатӣ равад, бояд дар бораи қоидаҳои муҳоҷират ба кишварҳои хориҷӣ маълумот дошта бошад.
Шумо нияти ба Федератсияи Россия, Британияи Кабир, Кореяи Чануби ва ё давлатҳои дигар нияти ба муҳоҷирати меҳнатӣ рафтанро доред, вале роҳи пайдо кардани кор дар ин кишварҳоро намедонед? Пас, ҳатман ба МД “Марказҳои машваратӣ ва омодагӣ пеш аз сафари муҳоҷирони меҳнатӣ”- дар шаҳри Душанбе ва Хадамоти муҳоҷирати Вазорати меҳнат, муҳоҷират ва шуғли аҳолӣ Ҷумҳурии Тоҷикистон муроҷиат намоед.
Маркази матуботи Хадамоти муҳоҷират
