25 июни соли равон дар Хадамоти муҳоҷират бахшида ба 27 – умин солгарди ба имзорасии Созишномаи умумии истиқрори сулҳ ва ризоияти миллӣ ҷамъомади тантанавӣ доир гашт.

Чорабинии идонаро Сардори Хадамоти муҳоҷират Нодирзода Иматшо ифтитоҳ намуда, изҳор доштанд, ки солҳои аввали соҳибистиқлолӣ миллати мо таҷрибаи талхи ҷанги таҳмилии шаҳрвандӣ ва санҷишҳои сангини таърихиро аз сар гузаронд.

Бо таъсиру дахолати қувваҳои беруна ихтилофи сиёсӣ ба низоъҳои дохилӣ оварда расонд, ки дар натиҷа ҳазорҳо шаҳрвандони мо иҷборан тарки ватан карданд. Мамлакати ҷавони мо зери хатари нестшавӣ қарор гирифт.

Хушбахтона ба бахти миллати сарбаланди тоҷик роҳбарии давлату миллати азияткашидаро сарвари ҷавони матинирода Эмомалӣ Раҳмон ба ӯҳда гирифт ва мамлакатро аз хатари нобудшавӣ ва халқро аз вартаи ҷанги хонумонсӯз наҷот бахшид.

Расо 27 сол муқаддам, 27 июн бо азму талошҳои фарзанди барӯманди халқи тоҷик Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон Созишномаи истиқрори сулҳ ва ризоияти миллӣ ба имзо расид ва ин сана ҳамчун яке рӯйдодҳои муҳим дар таърихи халқи тоҷик боқӣ монд.

Имрӯз мо бояд ин неъмати бебаҳоро чун гавҳараки чашм ҳифзу нигаҳ дорем, зеро тавре Пешвои муаззами миллат таъкид менамоянд, дар шароити ниҳоят печидаву ҳассоси минтақа ва ҷаҳони муосир тарғибу талқини ғояҳои сулҳу амният, суботу оромӣ, ватандӯстиву ватанпарастӣ, худогоҳиву худшиносӣ, ҳисси ифтихори миллӣ ва омӯхтани таъриху фарҳанги миллат аҳаммияти аз ҳарвақта бештар пайдо кардааст, – афзуд Нодирзода И.

Сипас, дар назди ҳозирин директори ташкилоти ҷамъиятии “Нидои дӯстон” Фақиров Амиралӣ баромад намуда, роҷеъ ба нақши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар таърихи давлатдориву давлатсозии навини тоҷикон суханронӣ намуд.

Маркази матбуоти Хадамоти муҳоҷират