Дар Муассисаи давлатии “Коллеҷи кӯҳӣ” ба номи Сороҷон Юсупова дар ноҳияи Фирдавсии пойтахт дар партави Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» таҳти унвони «Аз Пешво биомӯз, дарси ватанпарастӣ» ҳамоиш бо омӯзгорону донишҷӯён баргузор гардид.
Дар чорабинии мазкур намояндаи Мақомоти иҷроияи ҳокимияти давлатӣ дар ноҳияи Фирдавсӣ, намояндагони Раёсати Хадамоти муҳоҷират дар шаҳри Душанбе ва шуъбаи кор бо ҷавонон ва варзиши ноҳия иштирок ва баромад намуданд.
Директори коллеҷ Суфиев А., зимни ифтитоҳи ҳамоиш иброз дошт, ки Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» бо назардошти арзишҳои миллӣ, таълимоти ниёгон, таҷрибаи низоми қонунгузории миллии Ҷумҳурии Тоҷикистон таҳия ва қабул гардидааст.
«Дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» соли 2024 Соли маърифати ҳуқуқӣ эълон шуд.
Яке аз ҳадафҳои эълон гардидани Соли маърифати ҳуқуқӣ амалӣ намудани корҳои тарғиботиву ташвиқотӣ оид ба сиёсати ҳуқуқии Ҷумҳурии Тоҷикистон, махсусан қонунҳои соҳаҳои алоҳида барои баланд бардоштани ҳисси шаҳрвандӣ ва ташаккули тарбияи ватандӯстӣ ба ҳисоб меравад.
Масъалаҳои тарбияи ватандӯстӣ аз рӯзҳои аввали ба даст овардани Истиқлоли давлатӣ дар меҳвари сиёсати ҳуқуқии Ҷумҳурии Тоҷикистон қарор доранд»,- гуфта шуд дар ҳамоиш.
Ёдовар мешавем, ки дар шароити муосир масъалаи ташаккули тарбияи ватандӯстии шаҳрвандон, хусусан ҷавонон ва насли наврас яке аз афзалияти сиёсати давлатӣ ба ҳисоб рафта, барои рушду тараққиёти соҳаҳои алоҳидаи ҷомеа заминаи мусоид фароҳам меорад.
Тарбияи ватандӯстӣ боиси рушди соҳаҳои алоҳидаи мамлакат гардида, дар ҳифзи марзу бум, тамомияти арзии мамлакат ва таъмини сулҳу осоиштагӣ нақши асосӣ мегузорад.
Раёсати Хадамоти муҳоҷират дар шаҳри Душанбе
