Бо ибтикори Бахши Хадамоти муҳоҷират дар ноҳияи Айнӣ бо иштироки намояндагони Кумитаи ҳолатҳои Фавқулода ва мудофиаи граждании дар вилояти Суғд бо муҳоҷирони экологӣ ва меҳнатии ба ватан бозгашта вохӯрӣ баргузор гардид.

Дар вохӯри мудири бахши Хадамоти муҳоҷират дар ноҳияи Айнӣ Ғайбуллоев Баҳрулло қайд кард, ки дар ҷаҳони имрӯза дар ҳамагуна давлатҳо таҳдиди терроризм ва экстремизм вуҷуд дорад ва пешгири аз ҳамин гуна вабои аср давлатҳои ҷаҳонро водор сохтааст, ки созмонҳову ташкилотҳои гуногунро таъсис диҳанд. Дар суханҳои худ доимо Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон қайд менамоянд, ки террорист ватан, модар, дин, забон надорад ва мақсаду ҳадафи онҳо халалдор намудани ҷомеа ва несту нобуд намудани ахолии осоишта мебошад.

Инчунин, мавриди зикр аст, ки онҳо бо роҳи фиреб, ваъдаи маблағи барзиёд ва таъмин бо ҷойи кори сердаромад ҷавонон, муҳоҷирони меҳнатӣ ва табақаи аҳолие, ки сатҳи дониш, тафаккур ва ҷаҳонбинии суст доранд ҷалб намуда, ҳамагуна ҷиноятҳои вазнинро анҷом медиҳанд. Ҳангоми муҳоҷират дар хориҷа ба ҳар гуна шахсони алоҳидаи ношинос ва шубҳанок, ки маблағи зиёдро ваъда дода, бо ҳар роҳ дили онҳоро гарм намуда ба гӯруҳҳо ҳамроҳ менамоянд, бовар накарда, аз онҳо дӯрӣ ҷуянд. Дар шабакаҳои иҷтимоӣ, ки аз тарафи шахсони ба онҳо ношинос паёмакҳои шубҳанок ворид мешаванд ҷавоб надиҳанд ва ба наворҳои видеоии хусусияти экстремистӣ дошта ба истилоҳ лайк (like) нагузоранд.

Инчунин, ба самъи аҳолии ноҳия ва ҷамъомадагон ҷиҳати пайдо намудани ҷойи кор дар хориҷи кишвар пешниҳодҳо дода шуд. Дар сурати гирифтор шудан ба ҳар гуна мушкили ба ҳамагон тавсия дода шуд, ки ба сохторҳои дахлдор муроҷиат намоянд ва ба муҳоҷирони меҳнатие, ки дар хориҷи кишвар фаъолият менамоянд тавсия дода шуд, ки дар ҳолати рӯ ба рӯ шудан ба чунин ҳолатҳои номатлуб ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон, Сафорат ва Консулгарии Ҷумҳурии Тоҷикистон дар Федератсияи Россия муроҷиат намоянд.

Раёсати Хадамоти муҳоҷират дар вилояти Суғд