Тибқи дастури Вазорати меҳнат, муҳоҷират ва шуғли аҳолии Ҷумҳурии Тоҷикистон аз ҳисоби масъулини Хадамоти муҳоҷират дар шаҳру ноҳияҳо вобаста ба вазъи омаду рафти муҳоҷирони меҳнатӣ ба Федератсияи Россия дар фурудгоҳҳо, истгоҳҳои роҳи оҳан корҳои иттилоотию фаҳмондадиҳӣ пурзур карда шудааст.

Вобаста ба ин кормандони шуъбаи Хадамоти муҳоҷират дар шаҳри Кӯлоб ҳамарӯза дар “Фурудгоҳи байналмилалии Кӯлоб” вохӯриву мулоқотҳо бо шаҳрвандон –муҳоҷирони меҳнатӣ, ки ба самти Федератсияи Россия равонаанд, ба роҳ монда, ба самъи муҳоҷирони меҳнатӣ мерасонанд, ки ба қонуни Федератсияи Россия дар самти будубоши шаҳрвандони хориҷӣ аз ҷумла муҳоҷирати меҳнатӣ тағйиру иловаҳо ворид гардида, аз санаи 5-феврали соли 2025 мавриди амал қарор дода мешавад.

Бо назардошти он рўйхати шахсони назоратшавандаи Ҷумҳурии Тоҷикистон бо фарогирии зиёда аз 120 ҳазор нафар ҳамчун қонунвайронкунанда аз ҷониби Федератсияи Россия пешниҳод гардидааст, ки мавқеи будубоши онҳо номуайян мебошад.

Вобаста ба ин даъват ба амал оварда шуд, ки пеш аз сафар ба намояндагони Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар ҷойи истиқомат муроҷиат намуда, ҳуҷҷатҳои заруриро, аз қабили шиносномаи тиббӣ оиди надоштани бемориҳои  сироятӣ, доғи судӣ ва ҳуҷҷати касбӣ бо худ гирифта, баъдан ба Федератсияи Россия азми сафар намоянд.

Масъалаҳои дигаре, ки  ташвишовар мебошад ин хатарҳои ҷаҳони муосир,  аз ҷумла ба гурӯҳҳои  тундрави  террористию экстремисти  пайвастани  муҳоҷирон ба ҳисоб меравад, ки дар аксар маврид онҳо ба паёмакҳои бардурӯғи телефонӣ ва шабакаҳои интернети бовар намуда, ба доми чунин гурӯҳҳо афтида аз ватан дур монда, ҳаёти худ ва наздиконро доғдор месозанд.

Дар муҳоҷират ба доми гурӯҳҳои одамрабо низ афтодан аз эҳтимол дур нест, чунки онҳо ба ҷалби  маблағҳои калон ва ҷойи кор хуб ваъда намудан, инсонҳоро қурбонии манфиатҳои худ мегардонанд.

Гурӯҳҳои экстремистию террористӣ на танҳо ба давлат ва сохти конститутсионӣ, балки ба рӯзгори ободу осудаи ҳар яки мо ва аҳли ҷомеа  бевосита таҳдид мекунад.

Бинобар ин, муқовимат бо ин зуҳурот вазифаи ҳар як фарди солимфикру ватандӯст мебошад.

Ҳамзамон, ба саҳми муҳоҷирон расонида шуд, ки дар ҳолати дучор шудан ба ҳар гуна ҳолатҳои поймолшавии ҳуқуқҳояшон ба намояндагиҳои Вазорати меҳнат, муҳоҷират ва шуғли аҳоли дар шаҳрҳои Федератсияи Россия ва Сафорату консулгариҳои генералии Ҷумҳурии Тоҷикистон муроҷиат намоянд.

Дар анҷоми вохӯрӣ ба саволҳои сершумори муҳоҷирон ҷавобҳои қаноатбахш дода шуда, ба онҳо маводҳои иттилоотӣ ва буклетҳои роҳнамоӣ ҳангоми сафар тақсим гардида, ба нафароне, ки аз сафар баргаштанд барои дарёфти кори муносиб бо маоши арзанда ба ширкатҳои азими ватанӣ тавсияҳои муфид  дода шуд.

Раёсати Хадамоти муҳоҷират дар вилояти Хатлон