Кормандони масъули шуъбаи Хадамоти муҳоҷират дар шаҳри Кулоб оиди тақвият додани корҳои иттилоотию фаҳмондадиҳӣ дар байни муҳоҷирони меҳнатӣ дар “Фурудгоҳи байналмилалии Кӯлоб” вобаста ба муҳоҷиратӣ бехатар, пешгирии пайвастани муҳоҷирон ба сафи гурӯҳҳои ифротгароии динӣ, савдои одамон ва қонунҳои нави Федератсияи Россия дар самти муҳоҷират, ҷоннок намуда истодаанд.
Дар рафти вохӯриву мулоқотҳо бо шаҳрвандон – муҳоҷирони меҳнатӣ, масъалаи хело муҳим будубоши шаҳрвандони хориҷӣ, аз ҷумла шаҳрвандони Ҷумҳурии Тоҷикистон дар қаламрави Федератсияи Россия 90 ба 180 рӯз мебошад.
Ба маълумоти сокинони ҷумҳурӣ расонида мешавад, ки будубоши муҳоҷирони меҳнатӣ, дар ҳудуди Федератсияи Россия тибқи қонуни Федералӣ “Дар бораи будубоши қонунии шаҳрвандони хориҷӣ дар Федератсияи Россия” аз 25 июли соли 2002, №115 – ФЗ ва ворид намудани тағйиру иловаҳо ба қонуни Федералӣ аз 15 августи соли 1996 “Дар бораи тартиби даромад ба Федератсияи Россия ва баромад аз ҳудуди Федератсияи Россия”, ки 24 – ноябри соли 2014 таҳти № 357 ФЗ таҳия гардидааст, амалӣ карда мешавад.
Қонуни мазкур шаҳрванди хориҷиро муваззаф мегардонад, ки дар баробари гирифтани Патент, қайди ҷойи истиқомат, донистани забон, расму оин, таърих ва фарҳанги кишвари иқомат, минбаъд бояд талаботҳои қонуни мазкурро, ки дар он масъалаи будубоши шаҳрвандро 90 ба 180 рӯз нишон додааст, бечунучаро риоя намоянд.
Шаҳрвандони хориҷӣ, аз ҷумла муҳоҷирони мехнатии Ҷумҳурии Тоҷикистон ҳангоми ворид гардидан ба Федератсияи Россия метавонанд, ки 90 рӯз фаъолияти меҳнатӣ намуда, баъди он бояд кишвари иқоматро тарк намуда, 90 рӯзи боқимондаро дар қаламрави Ҷумҳурии Тоҷикистон (ё кишвари дигар) паси сар намоянд.
Баъди гузаштани муҳлати муқарраргардида шаҳрванд метавонад дигарбора вуруди қаламрави Федератсияи Россия гардида, фаъолияташро идома диҳад.
Ҳамзамон, дар рафти вохӯрӣ қайд гардид, ки имрўзҳо дар ҷаҳони муосир гурӯҳҳои террористӣ ва экстремистӣ фаъолият доранд, ки ҳадафи ин гурӯҳҳо ҷалби шахсони бегуноҳ, аз ҷумла ҷавонон ва муҳоҷирони меҳнатӣ барои содир кардани ҷиноятҳои вазнини террористию экстремистӣ буда, барои шомил кардан онҳоро ба сафи худ кӯшиш менамоянд, ба табақаи муайяни аҳолӣ рӯ биёранд, ки инҳоро ҷавонон, шахсони бекори ниёзманд, муҳоҷирони меҳнатӣ, шахсони ба маблағ ниёз дошта, дорои саҳияи пасти дониш ва маърифати ҳуқуқӣ ташкил медиҳанд.
Инчунин, даъват ба амал оварда шуд, ки дар давлати бегона эҳтиёткориро аз даст надода, фарҳангу тамаддуни миллати хешро ҳифз намуда, қонунҳои буду боши муҳоҷирати меҳнатиро риоя намоянд.
Дигар масъалае, ки ба саҳми шаҳрвандон расонида шуд, ин ҳодисаҳои рух додани савдои одамон ва одамрабоӣ мебошад.
Гуфта шуд, ки дар хориҷи кишвар ба чунин ҳолатҳо низ дучор шудан аз эҳтимол дур нест. Барои пулу маблағ ва истифода бурдани қувваи кории арзон шуда, гурӯҳҳои одамрабо шахсро ба ғуломӣ мефурушанд.
Бинобар ин, бо шахсони ношинос ва шубҳанок, ки шуморо ҷойи кори хубу маблағи калон ваъда мекунанд ҳаргиз бовар накарда тибқи шартнома бо корфармоёни аслӣ кору фаъолият кардан лозим аст.
Дигар мавзуе, ки шаҳрвандони мамлакат бояд донанду эҳтиёткор бошанд, ин бемории сироятӣ мебошад. Омили асосии он бе эҳтиётӣ ва надонистани чораҳои пешгирӣ аз сироятёбии он буда, тибқи хулосаи мутахассисон, хатари сироятёбӣ аз ин беморӣ дар давраи муҳоҷирати меҳнатӣ бештар ҷой дошта, он тавассути хунгузаронӣ, алоқаи ҷинсӣ ва аз ин шири модари сироятёфта ба кудак мегузарад.
Ҳукумати мамлакат дар ҳамкорӣ бо созмонҳои байналмилалӣ ва аҳли ҷомеа барои пешгирӣ ва аз байн бурдани ин беморӣ барномаҳои мушаххасро татбиқ намуда истодааст. Ташхису табобат аз ин беморӣ дар қаламрави тамоми ҷумҳурӣ имкон дошта, он ройгон мебошад.
Бинобар ин аз тамоми шањрвандони ҷумҳурӣ эҳтиромона хоҳиш карда мешавад, ки пеш аз сафар ба муҳоҷирати меҳнатӣ аз хатари сироятёбии бемории вируси норасоии масунияти одам ва воситаҳои пешгирии он дар марказҳои тиббӣ огоҳӣ пайдо намуда, ҳангоми дар муҳоҷирати меҳнатӣ будан худро аз он эҳтиёт намоянд ва дар бозгашт, ҳатман аз ташхиси бемории мазкур гузаранд.
Дар анҷоми вохӯрӣ ба суолњои сершумори шаҳрвандон ҷавобҳои қонатбахш дода шуд, ба онҳо буклетҳо тақсим карда шуд.
Раёсати Хадамоти муҳоҷират дар вилояти Хатлон
