Вохӯрии судманд дар бинои Омӯзишгоҳи касби техникии шаҳри Кӯлоб бо муҳоҷирони меҳнатӣ ва корҷӯён ба хориҷи кишвар баргузор гардид.
Дар он сардори шуъбаи Хадамоти муҳоҷират дар шаҳри Кӯлоб Абдуллоев И., муовини директори Муассисаи давлатии “Марказҳои машваратӣ ва омодагӣ пеш аз сафари муҳоҷирати меҳнатӣ” дар шаҳри Душанбе Парвизи Салимзод, намояндагони Созмони байналмилалии муҳоҷират дар доираи лоиҳаи “Муҳоҷирати бехатари коргарони мавсимӣ аз Осиёи марказӣ ба Британияи Кабир”, мутахассисони шуъбаи Хадамоти муҳоҷират дар шаҳри Кӯлоб Абдуллоев З., Тағоев Б., ва ҷамъ 70 – нафар корҷӯёну муҳоҷирони меҳнатӣ иштирок намуданд.
Мақсад аз баргузории чунин вохӯрӣ ин дастаҷамъона сафарбар намудани муҳоҷирони меҳнатии ватанӣ ба муҳоҷирати бехатар, муқовимат ба савдои одамон, талаботҳои давлатҳои қабулкунандаи муҳоҷирон ва қонунҳои амалкунандаи онҳо мебошад.
Дар рафти вохӯрӣ қайд гардид, ки аксар нафароне, ки ҳангоми сафар намудан ба хориҷи кишвар тавассути сомонаҳои ғайрирасмӣ ё дигар шахсони миёнарав худсарона амал менамоянд, ба мушкилотҳои сарбаста гирифтор мешаванд, ки ин ба буҷа ва шахсияти онҳо таъсири манфӣ расонида ё дар хориҷи кишвар аз ҳуқуқҳои худ маҳрум гардида, аз давлати қарордоштаи худ маҷбуран ихроҷ мегарданд.
Вохӯрии имрӯза вобаста ба дуруст омодаги гирифтан ба муҳоҷирати меҳнатии бехатар ва шарту талаботҳои давлатҳои қабулкунандаи муҳоҷирони меҳнатӣ равона гардида, тавсия дода шуд, ки пеш аз азми сафар ба хориҷи кишвар аз хизматрасониҳо ва машваратҳои Муассисаи давлатии “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳрҳои Душанбе, Бохтар, Хуҷанд ва Хоруғ, инчунин шуъбаю бахшҳои Хадамоти муҳоҷират дар шаҳру ноҳияҳо истифода баранд.
Намояндагони Хадамоти муҳоҷират ва Созмони байналмилалии муҳоҷират (СБМ) ба ҳозирин давлатҳои хориҷие, ки бо Ҷумҳурии Тоҷикистон вобаста ба қабули муҳоҷирони меҳнатӣ шартномаҳои тарафайн доранд муаррифӣ намуда, оид ба чи гуна дастрас намудани раводид (виза), ҷойҳои кории мавҷуда дар хориҷи кишвар ва шарту шароитҳои он, аз қабили роҳкиро, пардохти ҳуҷҷатгузорӣ, ҳаққи музди маош, соати корӣ дар як шабонарӯз, ҷойи хоб ва дигар хизматрасониҳои тарафҳо маълумотҳои муфассал доданд.
Дар анҷоми вохурӣ аз ҷониби намояндагони лоиҳаи “Муҳоҷирати бехатари коргарони мавсимӣ аз Осиёи марказӣ ба Британияи Кабир” виктаринаи саволу ҷавобҳои шавқовар вобаста ба масъалаҳои муҳоҷират гузаронида шуда, ғолибон бо туҳфаҳои хотиравӣ қадрдонӣ гардиданд.
Иштирокдорони вохӯрӣ аз баромадҳои мутахассисон қаноатманд гардида, вобаста ба тартиби будубош ва масъалаҳои муҳоҷират барои худ тасавуроти зарурӣ гирифта, изҳори минатдорӣ баён намуданд.
Раёсати Хадамоти муҳоҷират дар вилояти Хатлон
