Аз 19 то 23 августи соли ҷорӣ аз ҷониби мутахассисони Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон ва Созмони Байналмилалии Муҳоҷират (СБМ) дар ноҳияҳои Лахш, Тоҷикобод, Рашт, Сангвор ва Нуробод як қатор чорабиниҳои фаҳмондадиҳӣ вобаста ба рафти корҳои мавсимӣ дар Британияи Кабир, фаъолияти корӣ дар Федератсияи Россия, Ҷумҳуриҳои Корея, Литва, Болгария ва Мисри Араб, инчунин баланд бардоштани сатҳи огоҳии аҳолӣ дар бораи муҳоҷирати бехатар баргузор намуданд.
Дар чорабиниҳои мазкур аз ҷониби мутахассисон 5 семинар ва лексияҳо дар марказҳои ҷамъиятӣ, инчунин муассисаҳои таълимӣ бо иштироки шахсони мутасаддии Мақомоти иҷроияи ҳокимияти давлатӣ гузаронида шуд.
Ҳадафи асосии гузаронидани чорабиниҳои мазкур ин огоҳ намудани шаҳрвандон дар бораи ҷанбаҳои муҳими қонунгузории муҳоҷират, пешгирии муҳоҷирати ғайриқонунӣ, саривақт тарк намудани кишвари будубош баъд аз анҷоми муҳлати раводид ва хатарҳои эҳтимолии вобаста ба муҳоҷират мебошад.
Ҳамзамон дар вохӯриҳо бо сокинони ноҳияҳо маълумоти умумӣ дар бораи муҳоҷирати бехатар, ҳангоми муҳоҷират вохӯрдан бо шахсони фиребгар, ҳуқуқ ва ӯҳдадориҳои муҳоҷирон, ҳамкорӣ бо Хадамоти муҳоҷират, гузаштан аз муоинаи тиббӣ пеш аз муҳоҷират ва ташаккули малакаҳои касбӣ пешниҳод гардид.
Дар рафти чорабиниҳо фаъолони ноҳияҳо ва ҷамоатҳо доир ба масъалаи муҳоҷирати меҳнатӣ иштирок ва суханронӣ намуданд.
Инчунин, дар чорабиниҳо масъалаҳои асосии қонунгузории муҳоҷирати Федератсияи Россия ва тағйироти нав дар қоидаҳо мавриди баррасӣ қарор гирифта, ба иштирокчиён маълумот барои тамос ба телефони боварии Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон ва Созмони Байналмилалии муҳоҷират (СБМ) пешниҳод гардид.
Чорабиниҳои мазкур дар маҷлисгоҳҳои Мақомоти иҷроияи ҳокимияти давлатӣ мазкур баргузор гардида, буклетҳо оид ба муҳоҷирати бехатар супорида шуд.
Қайд кардан ба маврид аст, ки чунин чорабиниҳои иттиллоотӣ дар дигар шаҳру ноҳияҳои ҷумҳурӣ низ баргузор хоҳад гардид.
МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе
