Чанд рӯз аст, ки кормандони шуъбаи Хадамоти муҳоҷират дар ВМКБ корҳои иттилоотӣ-маърифатиро дар байни сокинони вилоят, аз ҷумла муҳоҷирони ба Ватан баргашта баргузор намуда истодаанд. Инак, чунин як вохӯрии судманд бо сокинони ҷамоатҳои деҳоти ноҳияи Мурғоб баргузор гардид.

Дар вохӯриҳо бо сокинони ноҳияи дурдасти Мурғоб мудири шуъбаи Хадамоти муҳоҷират дар ВМКБ Мулкамон Каниев муфассал дар бораи тағйиру иловаҳо дар қонунгузории Федератсияи Россия дар самти муҳоҷирати меҳнатӣ фаҳмонида, бори дигар таъкид намуд, ки бо сабаби риоя накардани қоидаҳои будубош дар ин давлат бисёри аз шаҳрвандон-муҳоҷирони меҳнатӣ берун карда шуда истодаанд.

Ин далели он аст, ки шаҳрвандони мо бе омодагии пешакӣ ба муҳоҷират сафар менамоянд ва бо сабаби сари вақт будубоши худро қонунӣ нагардонидан, ба мушкилиҳои зиёд дучор мешаванд.

Ин ҳолатро истифода бурда ашхоси “миёнарав” муҳоҷирони меҳнатиро бо музди ночиз ба кори ғайриқонунӣ даъват менамояд.

Ҳамзамон ҷавонони дар ҳолати душворӣ қарордоштаро гурӯҳҳои ифротгаро бо ваъдаи маблағи калон ба сафҳои худ ҷалб намуда, ба фаъолияти ғайриқонунӣ равона менамоянд.

Аз ин лиҳоз, ба мо зарур аст, ки шаҳрвандоне, ки хоҳиши сафар ба муҳоҷирати меҳнатӣ доранд, омодагии хубро бинанд ва ба сафарбар намудани муташаккилона ҷалб намоем.

Ба ғайр аз ин, ба иштирокчиён фаҳмонда дода шуд, ки дар дохили ҷумҳурӣ низ корхонаҳои саноатии зиёд ба истифода дода шуда истодаанд ва дар онҳо қувваи корӣ лозим мебошад.

Аз ҷумла, дар сохтмонҳои бузурги дохили ҷумҳурӣ – сохтмони НБО “Роғун” ва “Себзор”, қитьаи роҳи байналмилалии Дарвоз – Рӯшон ва дигар сохтмонҳо барои кормандон тамоми шароитҳо омода шуда, музди меҳнати шоиста пардохт карда мешаванд.

Вохӯриҳои судманд дар ҷамоатҳои деҳоти ба номи Г. Бердибаев, Мурғоб, Рангкул, Қизил -Работ ва Аличур баргузор гардиданд.

Шуъбаи Хадамоти муҳоҷират дар ВМКБ