Дар доираи корҳои фаҳмондадиҳӣ ва иҷрои дастуру супоришҳои роҳбарияти олии кишвар, вохӯрии гурӯҳи кории Мақомоти иҷроияи ҳокимияти давлатии ноҳияи Қубодиён бо сокинони деҳаҳои Рудак, Чимпӯштӣ, Чинористон, Заркамар ва Деҳбаланди Ҷамоати деҳоти Заркамар баргузор гардид.

Дар ҳайати гуруҳи корӣ намояндагони сохторҳои давлатӣ, аз ҷумла Хадамоти муҳоҷират, бахши ҷавонон, Комиссариати ҳарбӣ, Агентии меҳнат ва шуғли аҳолӣ, ҳамчунин намояндагони ҳизбӣ ва дигар мақомоти дахлдор иштирок намуданд.

Намояндаи Хадамоти муҳоҷират зимни баромади худ масъалаҳои муҳими марбут ба ислоҳоти соҳаи муҳоҷиратро мавриди баррасӣ қарор дода, таъкид намуд, ки дар солҳои охир сиёсати давлатӣ дар ин самт ба танзими босамар, ҳифзи ҳуқуқу манфиатҳои муҳоҷирони меҳнатӣ ва фароҳам овардани шароити мусоид барои фаъолияти қонунии онҳо равона гардидааст.

Зикр гардид, ки бо назардошти тағйироти ҷойдошта дар қонунгузории Федератсияи Россия, огоҳ будани шаҳрвандон аз талаботи нави ҳуқуқӣ, тартиби будубош, фаъолияти меҳнатӣ ва масъулиятҳо аҳамияти махсус дорад. Дар ин замина, намояндаи Хадамоти муҳоҷират сокинонро ба риояи қонунҳо ва истифодаи танҳо роҳҳои қонунии муҳоҷират даъват намуд.

Ҳамзамон, иттилоъ дода шуд, ки тибқи Стратегияи танзими раванди муҳоҷират дар Ҷумҳурии Тоҷикистон барои давраи то соли 2040, таваҷҷуҳи махсус ба диверсификатсияи муҳоҷират, яъне ҷалби шаҳрвандон ба бозорҳои меҳнати дигар кишварҳо, баланд бардоштани сатҳи маърифатнокии ҳуқуқии муҳоҷирон ва коҳиш додани муҳоҷирати ғайриқонунӣ зоҳир мегардад.

Дар идомаи суханронӣ таъкид шуд, ки яке аз самтҳои афзалиятноки сиёсати давлатӣ соҳибкасб намудани ҷавонон мебошад. Зеро доштани касбу ҳунар имконият фароҳам меорад, ки ҷавонон ҳам дар дохили кишвар бо ҷойи кор таъмин гарданд ва ҳам ҳангоми муҳоҷират дар хориҷ аз кишвар ҳамчун мутахассисони рақобатпазир фаъолият намоянд.

Дар ҷараёни вохӯрӣ ҳамчунин масъалаҳои муҳими иҷтимоӣ мавриди таваҷҷуҳ қарор гирифта, оид ба Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шарҳу тавзеҳ дода шуд ва аҳамияти он дар рушди соҳаҳои иқтисодиву иҷтимоӣ таъкид гардида, доир ба имкониятҳои шуғли аҳолӣ, касбомӯзӣ ва хизматрасониҳои давлатӣ ба сокинон маълумоти муфассал пешниҳод карда шуд.

Вохӯрӣ дар фазои озоди муколама баргузор гардида, сокинон ба намояндагони гурӯҳи корӣ саволҳои худро пешниҳод намуда, ҷавобҳои муфассал ва қонеъкунанда гирифтанд.

Маркази Матбуоти Хадамоти муҳоҷират