Тибқи барқияи ҳукуматӣ аз 31-уми майи соли 2025, №16/10-52 бо мақсади тавсеа ва таҳким бахшидани корҳои идеологӣ ва тарғиботию фаҳмондадиҳӣ дар нимсолаи дуюми соли 2025 нақшаҳои кории фаъолияти муштараки сохторҳои дахлдори самти робита бо ҷомеа барои марҳилаи аз 1-уми июл то 31-уми декабри соли 2025 ба нақша гирифта шудааст.
28-уми августи соли 2025 дар деҳаи Шуроби ҷамоати деҳоти Сабои ноҳияи Шаҳринав бо иштироки гурӯҳи таблиғотӣ мудири бахши Хадамоти муҳоҷират, намояндагон аз бахши кор бо занон, шуъбаи Агентии меҳнат ва шуғли аҳолӣ, бахши дин, танзими ҷашну маросими МИҲД-и ноҳия, Кумитаи давлатии амнияти ноҳия, Комисариати ҳарбӣ ва фаъолони касбу кори гуногуни ҷамоати деҳоти Сабои ноҳияи Шаҳринав суҳбату вохӯриҳо баргузор гардид.
Дар мулоқот нотиқот оид ба муҳтавои Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон ба Маҷлиси Олӣ ва дар Маҷлиси васеи Кумитаи Иҷроияи Марказии Ҳизби Халқии Демократии Тоҷикистон дуруст ва самаранок истифода бурдани қувваи барқ, риояи талаботи Қонуни Ҷумҳурии Тоҷикистон “Дар бораи энергетика”, самаранок истифода намудани заминҳои наздиҳавлигӣ, вазъи мураккаби ҷаҳони муосир, саҳмгузорӣ дар корҳои ободониву созандагӣ, сарсабзу хуррамгардонии ҳар гӯшаи диёр, ҷалби ҷавонон ба сафи Қувваҳои Мусаллаҳи Ҷумҳурии Тоҷикистон, риояи Қонунҳои Ҷумҳурии Тоҷикистон “Дар бораи танзими ҷашну маросимҳо дар Ҷумҳурии Тоҷикистон” ва “Дар бораи масъулият дар таълиму тарбияи кӯдак”, пешгирии шомилшавии ҷавонон ба гурӯҳҳои террористӣ ва экстремистӣ, истифодаи дурусти телефонҳои мобилӣ, пешгирии зӯроварӣ дар оила, худкушиву худсӯзӣ, муҳоҷирати бехатар, қонунҳои нави кишвари Россия дар самти муҳоҷират ва дигар масъалаҳои мубрами рӯз суханронӣ намуданд.
Дар рафти вохӯрӣ мудири бахши Хадамоти муҳоҷират дар ноҳияи Шаҳринав Ҷабборзода Расул, ба таваҷҷуҳи сокинон расонид, ки аз 1 сентябри соли 2025 дар шаҳри Москва ва вилояти Москва тартиби нави бақайдгирии шаҳрвандони хориҷие, ки бо мақсади фаъолияти меҳнатӣ бе раводид ба Федератсияи Россия ворид мешаванд, ҷорӣ карда мешавад.
Акнун, шаҳрандони Ҷумҳурии Тоҷикистон, ки бо мақсади кор ба Россия меоянд, инчунин аъзои оилаҳои онҳо, вазифадоранд ба қайд гирифта шаванд. Барои ин зарур аст ба Маркази бисёрфунксионалии муҳоҷират дар Сахарово ё ба шуъбаҳои ҳудудии Раёсати корҳои дохилии Россия оид ба масъалаҳои муҳоҷират муроҷиат намоянд.
Дар рафти бақайдгирӣ гирифтани изи ангуштон (дактилоскопия) ва аксбардорӣ гузаронида мешавад. Ҳамчунин, аз 1 сентябри соли 2025 насби барномаи мобилии “Амина” ҳатмӣ мегардад. Ин барнома ҷойгиршавии муҳоҷирро сабт намуда, маълумотро дар бораи мақоми ҳуқуқии ӯ намоиш медиҳад.
Набудани қайдгирӣ дар ҷойи иқомат, инчунин рад кардани истифодаи барномаи мобилӣ ҳамчун вайронкунии қоидаҳои муҳоҷират ҳисобида шуда, метавонад боиси ҷавобгарии маъмурӣ, то ихроҷ аз ҳудуди Федератсияи Россия ва манъи воридшавии такрорӣ гардад.
Ба шаҳрвандони Ҷумҳурии Тоҷикистон ва аъзои оилаи онҳо тавсия дода мешавад, ки пешакӣ шароити иқоматро муайян намуда, тамоми ҳуҷҷатҳои заруриро бо худ дошта бошанд ва дар ҳолати пайдо шудани саволҳо барои тавзеҳот ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия ё ба шуъбаҳои ҳудудии мақомоти муҳоҷиратии Россия муроҷиат намоянд.
Дар фарҷоми вохӯрӣ сокинон ба саволҳои худ посухҳои мушаххас гирифтанд.
Бахши Хадамоти муҳоҷират дар ноҳияи Шаҳринав
