Дар ноҳияи Фархор бо иштироки сокинон, имомхатибону фаъолон ва намояндагони ҷамоатҳои деҳот вохӯрии гурӯҳи тарғиботӣ Мақомоти иҷроияи ҳокимияти давлатии ноҳия баргузор гардид.

Масъулин оид ба пешгирии шомилшавии ҷавонон ба ҳизбу ҳаракатҳои ифротгаро, таълимоти ғайрирасмии динӣ, пешгирии хушунату зӯроварӣ дар оила, ҷалби ҷавонон ба хизмати ҳарбӣ, омӯзиши забонҳои хориҷӣ, истифодаи оқилонаи телефонҳои мобилӣ аз ҷониби наврасону ҷавонон, роҳҳои баланд бардоштани маърифати ҳуқуқии шаҳрвандон, тоза нигоҳ доштани муҳити зист, диққати аввалиндараҷа додан ба таълиму тарбияи кӯдак, ҳамзамон оиди тағйироту иловаҳое, ки дар қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” ва “Масъулияти падару модар дар таълиму тарбияи кӯдак” ворид гардидаанд, маълумот дода, аз сокинон даъват ба амал оварданд, ки нисбати қонунҳои мазкур ба саҳлангорӣ роҳ надода, аз масрафи зиёд ҳангоми маросимҳои миллӣ худдорӣ намуда, пеш аз ҳама диққати аввалиндараҷаи худро ба таълиму тарбияи кӯдакону фарзандон равона намоянд. То дар оянда фарзандони мо насли худогоҳу хештаншинос ва ватандӯсту ватанпараст ба воя расида, барои пешрафту ободии кишвар саҳми арзандаи худро гузоранд.

Намояндаи Хадамоти муҳоҷират, ки дар гурӯҳи тарғиботӣ шомил аст, ба самъи сокинони ноҳия расонид, ки мутобиқи қонунгузории муҳоҷирати Федератсияи Россия, аз 5 феврали соли 2025 Феҳристи шахсони назоратшаванда (ФШН) ба фаъолият оғоз намудааст.

Ҳадафи асосии ин феҳрист — таъмини риояи қонунгузории муҳоҷират, пешгирии будубоши ғайриқонунии шаҳрвандони хориҷӣ ва баланд бардоштани сатҳи тартиботи ҳуқуқӣ дар соҳаи муҳоҷират мебошад.

Тибқи маълумоти расмӣ, дар бештари ҳолатҳо ворид кардани маълумоти шаҳрвандони хориҷӣ ба ФШН ба поёни муҳлати будубоши муваққатӣ вобаста аст. Яке аз сабабҳои маъмултарин — вайрон кардани қоидаи “90/365” мебошад.

Мутобиқи қоидаҳои нав, аз 1 январи соли 2025 муҳлати будубоши шаҳрвандони хориҷие, ки бе раводид ба қаламрави Федератсияи Россия ворид мешаванд, наметавонад аз 90 рӯз дар як соли тақвимӣ зиёд бошад.

Айни замон дар низоми муҳоҷират механизми ҳисобу назорати автоматикии муҳлати будубош татбиқ гардидааст.

Шаҳрвандоне, ки муҳлати иҷозатдодаи будубошро риоя намекунанд, ба таври худкор ба Феҳристи шахсони назоратшаванда шомил мегарданд. Ин иқдом имконият медиҳад, ки шумораи шахсони дорои мақоми ғайриқонунии муҳоҷират дар ҳудуди Федератсияи Россия ба ҳадди ақал расонида шавад.

Аз ҳамаи шаҳрвандони ҷумҳурӣ даъват карда мешавад, ки қонунгузории муҳоҷирати Федератсияи Россияро қатъиян риоя кунанд, ҳуҷҷатҳои иҷозатдиҳандаро сари вақт тамдид намоянд, дар қаламрави Россия тибқи меъёрҳои ҳуқуқӣ амал кунанд.

Ёдрас менамоем, ки Феҳристи шахсони назоратшаванда (ФШН) воситаи расмии назорати риояи қонунгузории муҳоҷират дар Федератсияи Россия мебошад. Ҳамаи шаҳрвандони хориҷие, ки барои будубоши қонунӣ асос надоранд, ба таври ҳатмӣ ба ин феҳрист дохил карда мешаванд.

Ба маълумоти шаҳрвандон расонида мешавад, ки дар ҳолати пайдо шудани саволҳо дар ин самт метавонанд ба Намояндагии Вазорати меҳнат муҳоҷират ва шуғли аҳолии Ҷумҳурии Тоҷикистон дар кишвари Россия муроҷиат намоянд.

Дар фарҷом як гурӯҳ фаъолон ва иштирокчиёни вохӯрӣ низ дар атрофи суханрониҳои масъулони тарғиботӣ фикру мулоҳизаҳои судманди худро баён доштанд.

Маркази матуботи Хадамоти муҳоҷират