Риояи талаботҳои амалкунандаи қонуни Федералӣ “Дар бораи будубоши қонунии шаҳрвандони хориҷӣ дар Федератсияи Россия”, тартиби ҳуҷҷатгузорӣ ва дигар хизматрасониҳои фаъолияти меҳнатии мувақатӣ дар Федератсияи Россия, доштани маълумоти зарурӣ оид ба муҳоҷирати меҳнатии бехатар, хавфҳои муҳоҷират, пешгирии муҳоҷирати ғайриқонунӣ ва худдорӣ намудан аз воридшавӣ ба гурӯҳҳои тундрави ҳизбу ҳаракатҳои террористию экстремистӣ, ин буд он саволҳое, ки кормандони масъули шуъбаи Хадамоти муҳоҷират дар шаҳри Кӯлоб дар “Фурудгоҳи байналмилалии Кӯлоб” ба шаҳрвандоне, ки барои фаъолияти меҳнатӣ ба кишвари Россия сафар доранд, иброз намуданд.
Дар рафти вохӯрӣ намояндаи шуъбаи Хадамоти муҳоҷират дар шаҳри Кӯлоб Ашуров С., вобаста ба мушкилотҳое, ки имрӯзҳо дар раванди будубоши муҳоҷирати меҳнатӣ ба вуқуъ омадааст ва чи тавр аз ин омилҳо пешгирӣ намудан суханронӣ намуда, ҳозиринро ба қонунҳои нави амлкунандаи Федератсияи Россия шинос намуд.
Аз ҷумла, ба саҳми муҳоҷирон расонида шуд, ки вазъи номуътадили ҷаҳони имрӯза моро водор месозад, ки дар ҳамаи самтҳои мухталифи аҳолии кишвар оқилона амал намоем. Бо назардошти ин ҳангоми сафар ба Федератсияи Россия ҳатман аз мутахассисони касбии Хадамоти муҳоҷирати Вазорати меҳнат, муҳоҷират ва шуғли аҳолӣ, ки дар тамоми шаҳру ноҳияҳои ҷумҳурӣ фаъолият доранд истифода бурда, бо гирифтани маслиҳатҳои муфид шиносномаи худро аз санҷиши маҳзанаи манъшудагон гузаронида, баъдан азми сафар намоянд.
Ҳамзамон, қайд гардид, шаҳрвандоне, ки ғайриқонунӣ дар қаламрави Федератсияи Россия қарор доранд, тибқи Фармони Президенти Федератсияи Россия аз 28 декабри соли 2024, №1126 барои танзими ҳуқуқи худ ё хориҷ шудан аз қаламрави Россия то санаи 10 сентябри соли 2025 муҳлат доранд. Вобаста ба кам мондани муҳлат тавсия дода шуд, ки барои барасмиятдарории будубоши худ дар қаламрави кишвари номбурда ба сохторҳои дахлдори ҳуқуқии ФР ё Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ФР муроҷиат намуда, ҳолати ҳуқуқии худро ба танзим дароранд.
Хотиррасон гардид, ки дар хориҷи кишвар ба тарзи дуруст пур намудани варақаҳои баҳисобгирии муҳоҷирати меҳнатӣ ва бастани шартномаҳои тарафайн байни корфармо бо коргар бояд аҳамияти ҷиддӣ дод ва пеш аз сафар барои фаолияти меҳнатӣ ба дигар давлат, аз ҷумла Федератсияи Россия ҳар нафар бояд касби муайяне дошта бошад, забони давлатии кишвари қабулкунандаро ҳадди ақал бо тарзи муошират донад ва аз тартиботу қонунҳои нави амалкунандаи ин давлат хабардор бошад, то ин ки аз хатарҳои ба муҳоҷирони меҳнатӣ таҳдидкунанда дар амон бошад.
Инчунин, дар ҷараёни вохӯрӣ доир ба масъалаҳои пешгирии шомилшавии шаҳрвандон, бахусус муҳоҷирони меҳнатӣ ба ҳаргуна ҳизбу ҳаракатҳои тундрави террористию эктремистӣ, ҷинояту ҳуқуқвайронкунӣ, омӯзиши фарҳанги бегона ва дигар масоили мубрами рӯз ибрози ақида гардида, ба саҳми ҳозирин расонида шуд, ки ҳар як фарди солимфикр бояд худро аз таъсири чунин гурӯҳҳо дар канор гирад, зеро аъзоёни гурӯҳу созмонҳои экстремистию террористӣ ва ифротӣ шахсро тариқи давъатҳои таблиғотӣ истифода аз паёмакҳои телефонӣ, саҳифаҳои иҷтимоии интернетӣ, аз қабили однокласник, фейсбук ва дигар сомонаҳо бо ташвиқоту ваъдаҳои бардурӯғ ҷалб намуда, барои амалӣ намудани ҳадафҳои нопоки худ истифода мебаранд.
Бо назардошти ин таъкид гардид, ки дар мавриди дучор омадан ба чунин ҳолатҳо эҳтиёткор буда, мушкилоти худро на ба танҳоӣ, балки ба Сафорат, Консулгариҳо ва Намояндагиҳои Вазорати меҳнат, муҳоҷират ва шуғли аҳолӣ, диаспортҳо ва мақомотҳои дахлдори ҳифзи ҳуқуқи Федератсияи Россия ва ё дигар давлате, ки дар он қарор доред муроҷиат намуда ҳал намоед.
Дар рафти суҳбат ба нафароне, ки бо роҳи маъмурӣ аз кишвари Россия берун карда шуданд, роҳнамоӣ гардид, ки руҳафтода нашуда ба сохторҳои Агентии меҳнат ва шуғли аҳолӣ дар шаҳру ноҳия ва вилоятҳои ҷуҳурӣ муроҷиат намуда, фаъолияти кориро идома диҳанд.
Қайд гардид, ки айни замон дар дохили кишвар ҷойҳои кории холӣ бо музди меҳнати арзанда ва шароиту имконияти хуб дар ширкатҳои сохтмони, саноатӣ, роҳсозӣ ва дигар корхонаҳои бузурги ватанӣ фароҳам буда, қувваи корӣ ва мутахассисони соҳибмалака бемамоният ба кор қабул карда мешаванд.
Дар фарҷоми вохӯрӣ ба саволҳои сершумори шаҳрвандон вобаста ба масъалаҳои муҳоҷират, бакортаъминшавию касбомӯзӣ ҷавобҳои қаноатбахш дода шуда, маводҳои иттилоотӣ ва брошюраҳо ҳангоми сафар тақсим карда шуд.
Раёсати Хадамоти муҳоҷират дар вилояти Хатлон
