Дар доираи татбиқи нақшаи чорабиниҳои тарғиботию фаҳмондадиҳӣ, бо мақсади тақвияти ҳамкории мутақобила бо ҷомеа ва боло бурдани маърифати шаҳрвандии аҳолӣ, вохӯрии навбатии гурӯҳи тарғиботии Мақомоти иҷроияи ҳокимияти давлатии ноҳияи Темурмалик дар ҳамкорӣ бо Кумитаи иҷроияи ҲХДТ дар ноҳия дар маҳаллаи Чинор ҷамоати деҳоти Ҳусайнобод баргузор гардид.
Дар мулоқот намояндагони сохторҳои Мақомоти иҷроияи ҳокимияти давлатии ноҳия, КИ ҲХДТ дар ноҳия, инчунин намояндаи бахши Хадамоти муҳоҷират, ки дар гурӯҳи тарғиботӣ шомил аст, иштирок ва суханронӣ намуданд.
Мавзӯъҳои муҳими рўз, аз ҷумла пешгирии шомилшавии ҷавонон ба гурӯҳҳо ва ҳаракатҳои ифротгаро, мубориза бо хатарҳои терроризму экстремизм, зарурати зиракии сиёсӣ, муҳоҷирати бехатар, қонунҳои нави ФР дар самти муҳоҷират, сарфакорона истифода бурдани нерӯи барқ, хусусан дар мавсими гармо ва истифодаи самараноки қитъаҳои замини наздиҳавлигӣ ба хотири беҳтар намудани сатҳи иқтисодии хонаводаҳо ва таъмини амнияти озуқаворӣ дар меҳвари баромадҳо қарор доштанд.
Намояндаи Кумитаи иҷроияи ҲХДТ дар ноҳияи Темурмалик баромад намуда, ба муҳтавои Паёми Асосгузори сулҳу ваҳдати миллӣ — Пешвои миллат, Раиси муаззами ҲХДТ муҳтарам Эмомалӣ Раҳмон, ки зимни маҷлиси васеи Кумитаи Марказии Ҳизб 17 июли соли 2025 ироа гардид, ишора намуда, таъкид дошт, ки ҲХДТ ҳамчун нерӯи таъсиргузори сиёсӣ бояд фаъолияташро дар самти таҳкими давлатдорӣ, баланд бардоштани маънавиёти ҷомеа, тарбияи насли солим ва рушди деҳоту шаҳрҳо боз ҳам тақвият бахшад.
Зикр гардид, ки ҳар як шаҳрванди масъулиятшинос бояд дар таҳкими субот, амният ва мубориза бо ҳар гуна падидаҳои номатлуб саҳми худро гузошта, дар пешбурди зиндагии иҷтимоиву иқтисодии ҷомеа бетараф набошад.
Мудири бахши Хадамоти муҳоҷират дар ноҳияи Темурмалик Сафаров Баҳодур баромад намуда, ба таваҷҷуҳи сокинон расонид, ки марҳилаи дуюми озмоиши санҷиши қоидаҳо ва шартҳои вуруд ба Русия барои шаҳрвандони хориҷӣ аз 30 июни соли 2025 оғоз ёфтааст.
Хотиррасон намуд, ки барои шаҳрвандони хориҷӣ замимаи мобилии ruID дастрасӣ дорад, ки тавассути он шаҳрвандон метавонанд дар портали Хадамоти давлатӣ ҳисоб эҷод кунанд, СНИЛС гиранд ва дар бораи сафари худ ба Федератсияи Россия огоҳинома пешниҳод намоянд.
Ҳамзамон ба маълумоти сокинони ноҳия расонид, ки дар ҳолати пайдо шудани саволҳо дар ин самт шаҳрвандони ҷумҳурӣ метавонанд ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар кишвари Россия оид ба муҳоҷират муроҷиат намоянд.
Иштирокчиёни вохӯрӣ идомаи чунин чорабиниҳоро дар дигар маҳаллаҳо зарур ва саривақтӣ арзёбӣ намуда, аз ташкили ин мулоқоти созанда изҳори сипос карданд. Дар охир, сокинон суолҳои худро матраҳ намуда, посухҳои муфассал ва муътамад дарёфт карданд.
Раёсати Хадамоти муҳоҷират дар вилогяти Хатлон
