Бо ибтикори бахши Хадамоти муҳоҷират дар шаҳри Конибодом дар ҳамкорӣ бо Мақомоти иҷроияи ҳокимияти давлатии шаҳр дар Ҷамоати деҳоти Пӯлотон, деҳаи Сари Мазор вохӯрии навбатӣ бо иштироки имомхатиби шаҳр – Хидоятов Нуруллохон, сардори шуъбаи ташкилии КИ ҲХДТ – Акмал Ализода, сармутахассиси шуъбаи рушди ҳунарҳои мардуми ва касбҳои муосир дар шаҳр – Ваҳҳобова Солеҳа, сармутахассиси шуъбаи рушди иҷтимоӣ ва робита бо ҷомеа – Толибов Искандар ва сармутатахассис – котиби васояту парасторӣ оид ба ҳуқуқи кӯдак – Шокирова Фарида, баргузор гардид.
Дар чорабинӣ дар бораи “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021 – 2025”, либоспӯшии фарҳанги миллии бегона (сатру ҳиҷоб аз занону духтарон, ришмонии ҷавонон), паҳнгардии адабиёти хусусияти экстремистӣ, шомилшавии ҷавонон ба ҳизбу ҳаракатҳои ғайриқонунӣ, ҷиноятсодиркунӣ миёни ҷавонон, муҳоҷирати бехатар, пешгирӣ савдои одамон, мавриди муҳокимаи ҳозирин қарор дода шуд.
Дар интиҳо мудири шуъбаи ташкилии КИ ҲХДТ дар шаҳр – Акмал Ализода баромад намуда, чунин ибрози ақида намуд: “Дар ин давраи ҳассос мо бояд бениҳоят ҳушёр ва эҳтиёткор бошем. Ба насли ҷавон ва наврас тарзи ҳаёти солим, бидуни ҳар гуна ҷангу ваҳшониятро тарғибу ташвиқ созем. Таълиму тарбияро тавре ба роҳ монем, ки барои бекориву зоеъ рафтани вақти холӣ фурсат наёбанд.
Бештар ба забономӯзиву ҳунармандӣ ҷалб гарданд, то дар оянда тавонанд зиндагии шоиста дошта бошанд. Ҳаргиз ба даъватҳои бардурӯғ бовар накунанд. Наврасону ҷавонон бояд муттаҳид, якдил ва дастаҷамъ бошанд, то ба иғвои хоинон дода нашаванд, тамоми кӯшишро ба харҷ диҳанд, то ин ки ватани худро аз дасисаҳои душманон эмин нигаҳ доранд. Ба насли наврас ва ҷавон фаҳмонем, ки ҷиҳоди мо ҳифзу ҳимояи ватан, обод кардани он, хизмати падару модар, тарбияи фарзандон, тарғиби некиву накӯкорист. Мо таҳти роҳбарии Асосгузори сулҳу вахдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон посбони сулҳу суботи кишвар мебошем.
Дар фарҷоми чорабинӣ мудири бахши Хадамоти муҳоҷират дар шаҳр –Толибова Фарзона ба таваҷҷуҳи сокинон расонид, ки тибқи Фармони Президенти Федератсияи Россия аз 28 апрели соли 2025, таҳти №272 “Оиди ворид намудани тағйироту илова ба Фармони Президенти Федератсияи Россия аз 30 декабри соли 2024, № 1126”, муҳлати қонунигардонӣ дар Федератсияи Россия то 10 сентябри соли 2025 тамдид карда шуд.
Шаҳрвандони Ҷумҳурии Тоҷикистон, ки дар қаламрави Федератсияи Россия бе ҳуҷҷати расмӣ қарор доранд, имконият доранд, ки то санаи 10 сентябри соли 2025 ҳуҷҷатҳои худро ба расмият дароранд.
Ҳамзамон, ба иттилои сокинони шаҳр расонида шуд, ки дар ҳолати пайдо гардидани саволҳо дар ин самт метавонанд ба масъулини Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ФР оид ба муҳоҷират муроҷиат намоянд.
Раёсати Хадамоти муҳоҷират дар вилояти Суғд
