Кормандони шуъбаи баҳисобгирӣ ва хизматрасонӣ ба муҳоҷирон дар ҶСК “Фурудгоҳи байналмилалии шаҳри Душанбе” ва КВД “Истгоҳи роҳи оҳани шаҳри Душанбе”- и раёсати Хадамоти муҳоҷират дар шаҳри Душанбе бо як гурӯҳ шаҳрвандони ҷумҳурӣ, ки тавассути парвоз барои фаъолияти меҳнатӣ ба шаҳрҳои Федератсияи Россия равонаанд, вохӯрии навбатӣ барпо намуданд.

Зимни вохӯрӣ бо мусофирон муфассал дар бораи тағйиру иловаҳо ба қонунгузории нави Федератсияи Россия дар самти муҳоҷират, гирифтани Сертификат, патент, полиси тиббӣ суғуртавӣ, бастани шартнома бо корфармо, ҳолати будубош дар кишвари қабулкунанда, аз ҷумла дар бораи он нафароне, ки вурудашон ба кишвари Россия манъ аст, суханронӣ намуданд. Таъкид шуд, ки сокинони мамлакат пеш аз сафар ҳатман ба шуъбаву бахшҳо ва раёсатҳои Хадамоти муҳоҷират дар шаҳру ноҳияҳои ҷумҳурӣ муроҷиат намоянд.

Дар навбати худ мусофирони хатсайрҳо, ки шумораи зиёди онҳоро муҳоҷирони меҳнатӣ ташкил медод, аз масъалаҳои мубрами рӯз ва проблемаҳои муҳоҷирати корӣ пурсон шуда, ба саволҳои додашуда ҷавобҳои мушаххас гирифтанд. Ҳар як сокини кишвар хотирасон карда шуд, ки пеш аз сафар ба давлати Россия ҳатман забони русӣ, таърих ва қонунгузории давлати қабулкунандаро донанд ва соҳиби касбу ҳунари коргарӣ буданашон низ шарт аст.

Дар хотимаи суҳбат ба ҳар як шаҳрванд – муҳоҷири меҳнатӣ буклетҳо бо забони тоҷикӣ ва русӣ дар бораи тарзи гирифтани патент, будубош, вакансияи ҷойҳои корӣ дар шаҳрҳои Федератсияи Россия супорида шуд.

Минбаъд чунин вохӯриҳои судманд аз ҷониби кормандони шуъба, идома хоҳад ёфт.

Шуъбаи баҳисобгирӣ ва хизматрасонӣ ба муҳоҷирон дар ҶСК “Фурудгоҳи байналмилалии шаҳри Душанбе” ва КВД “Истгоҳи роҳи оҳани шаҳри Душанбе”- и раёсати Хадамоти муҳоҷират дар шаҳри Душанбе