Кормандони шуъбаи Хадамоти муҳоҷират дар шаҳри Кӯлоб вохӯрии навбатиро бо шаҳрвандони ҷумҳурӣ-муҳоҷирони меҳнатӣ дар Фурудгоҳи байналмилалии шаҳри Кӯлоб баргузор намуданд.

Зимни вохӯрӣ бо шаҳрвандон мутахассиси пешбари Шуъба Сафаров Абдулфайз баромад намуда, оид ба вазъи имрузаи муҳоҷират дар Федератсияи Россия сухан гуфта, қайд намуд, ки имрӯзҳо дар ҷаҳони муосир гурӯҳҳои террористӣ ва экстремистӣ фаъолият доранд, ки ҳадафи ин гурӯҳҳо ҷалби шахсони бегуноҳ, аз ҷумла ҷавонон ва муҳоҷирони меҳнатӣ барои содир кардани ҷиноятҳои вазнини террористию экстремистӣ буда, барои шомил кардан ба сафҳои худ кушиш менамоянд, ба табақаи муайяни аҳолӣ рӯ биёранд, ки инҳоро ҷавонон, шахсони бекори ниёзманд, муҳоҷирони меҳнатӣ, шахсони ба маблағ ниёз дошта, аз волидон ва ё ҷамъият ранҷида, дорои пасти дониш ва маърифати ҳуқуқӣ ва дигарон ташкил медиҳанд.

Ин зуҳурот на танҳо ба сиёсати дохилии кишварҳои алоҳида, балки дар муносибатҳои давлатҳои ҷудогона роҳандозӣ шуда истодааст, ки Пешвои миллат муҳтарам Эмомалӣ Раҳмон дар ин радиф қайд намуда буданд: “Мубориза бо терроризм ва экстремизм фароҳам овардани фазои боварӣ, эҳтиром ба манфиатҳои ҳамдигар ва муттаҳид шудани ҳамаи кишварҳои дунёро дар пешоруи ин хатари умумӣ тақозо менамояд”.

Ифротгароӣ ва терроризм – яке аз чунин зуҳуроти номатлуби замони муосир ба шумор рафта, мубориза бар зидди он қарзи ҳар як инсони комил мебошад. Терроризму экстремизм ҳамчун вабои аср ва дигар ҳодисаҳои номатлуб ба оромию амнияти саёра ва пойдории давлат таҳдиду хатарҳо эҷод карда, амну осоиш ва ваҳдати халқу миллатҳоро барҳам мезанад, барои ҳамин шаҳрвандони мо бояд дар давлати дигар эҳтиёткор бошанд. Дониста бошед, ки шахсони бегона метавонанд ба Шумо таъсир расонида Шуморо гумроҳ намоянд ва ба созмонҳои гуногуни радикалӣ, экстремистию террористӣ ҷалб намоянд.

Бояд тазаккур дод, ки кормандони шуъбаи Хадамоти муҳоҷират дар шаҳри Кӯлоб мунтазам зимни ба сафар рафтан ва аз сафар баргаштани шаҳрвандони мамлакат вохӯриҳо доир намуда, дар масоили муҳоҷирати меҳнатӣ корҳои фаҳмондадиҳиро оид ба қонунгузориҳои нави Федератсияи Россия дар самти муҳоҷирати меҳнатӣ, аз қабили гирифтани патент, донистани забони давлати қарордошта, инчунин доштани ҳуҷҷати тасдиқкунандаи касбу ихтисосро ба роҳ мемонанд.

Ба муҳоҷирони меҳнатӣ таъкид гардид, ки дар муҳоҷират бо истифода аз суғуртаи давлатии давлати қарордоштаи худ бехатарии вазъи саломати ё дучор гардидан ба ягон ҳодиссаи нохӯшро таъмин намуда, дар доираи шартномаи байни корфармо ва коргар ба қайди нотариалӣ фаъолияти кориро ба роҳ монда, як нусхаи шартномаро бо худ гирад.

Ҳамзамон даъват ба амал оварда шуд, ки дар давлати бегона эҳтиёткориро аз даст надода, фарҳангу тамаддуни миллати хешро ҳифз намуда, қонунҳои буду боши муҳоҷирати меҳнатиро риоя намоянд.

Дар охир ба суолҳои сершумори муҳоҷирони меҳнатӣ аз ҷониби кормандони шуъба ҷавобҳои мушаххас дод шуда, ба онҳо буклетҳои Хадамоти муҳоҷират оид ба: “Тундгаро, экстремист ва терорист киҳоянд ва чаро онро бояд донист?”, “Дар кадом ҳолатҳо шахс ба ҷавобгарӣ кашида мешавад?” тақсим карда шуд.

Шуъбаи Хадамоти муҳоҷират дар шаҳри Кӯлоб