Тибқи нақша-чорабиниҳои Мақомоти иҷроияи ҳокимияти давлатии ноҳияи Темурмалик дар саҳни барҳавои МТМУ рақами 1-и ноҳия вохӯрии гурӯҳи кории мақомот бо сокинони маҳаллаҳои ҷамоати шаҳраки Баҳманруд, баргузор гардид.

Зимни суҳбат аз ҷониби масъулон доир ба шарҳу тавзеҳи нуктаҳои Паёми навбатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, пешгирии шомилшавии ҷавонон ба ҳизбу ҳаракатҳои ифротӣ, роҳҳои коҳиш додани ҷинояту ҷинояткорӣ дар байни наврасону ноболиғон, ҷоннок намудани масъулияти падару модар дар таълиму тарбияи кӯдак, истифодаи оқилонаи телефонҳои мобилӣ, самаранок истифода бурдани нерӯи барқ, пешгирии зӯроварӣ дар оила, ҷалби ҷавонон ба касбомӯзӣ, омӯзиши забонҳои хориҷӣ, муҳоҷирати бехатар, тағйироту иловаҳо дар қонунгузории ФР дар самти муҳоҷират, даъвати саривақтии ҷавонон ба хизмати ҳарбӣ ва дигар масоили муҳими рӯз андешаронӣ намуда, сокинонро ба татбиқи амалии нуктаҳои ироагардида даъват намуданд.

Ҳамзамон, дар рафти чорабинӣ мудири бахши Хадамоти муҳоҷират дар ноҳия Сафарзода Баҳодур, доир ба тағйироту иловаҳо ба қонунгузории Федератсияи Россия дар самти муҳоҷирати меҳнатӣ, будубоши шаҳрвандони Ҷумҳурии Тоҷикистон дар давлати номбурда, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оид ба донистани забони русӣ, таъриху тамаддун ва асосҳои қонунгузории ин кишвар (тарзи супоридани имтиҳонҳо), доштани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан, гирифтани Патент, тартиби дар қайди ҷойи истиқомат гузоштани шаҳрвандони хориҷа, тарзи бастани шартномаи меҳнатӣ, ҳуқуқ ва уҳдадориҳои корфармо ва коргар, фаҳмонида шуд.

Аз ҷумла, қайд кард, ки дар ҳолати зарур набудан ба қаламрави Федератсияи Россия сафар накунанд, инчунин доир ба истифодаи дурусти шабакаҳои иҷтимоӣ якчанд дастур доданд, ки тариқи телефонҳои мобилӣ низ ба гурӯҳҳое, ки оиди дуруст ё нодуруст буданаш маълумот надоранд шинос нашаванд ва фирефтаи нафарони бадхоҳ ва душманони миллат нагарданд.

Дар поёни чорабинӣ як гурӯҳ фаъолони ҷамоати шаҳраки Баҳманруд низ дар тақвияти нуктаҳои ироагардида мулоҳизаҳои судманди худро баён дошта, бо боварии комил таъкид намуданд, ки баҳри татбиқи амалии нуктаҳои ироагардида корбариро бо сокинон зиёд хоҳанд намуд.

Раёсати Хадамоти муҳоҷират дар вилояти Хатлон