Гурӯҳи кории Мақомоти иҷроияи ҳокимияти давлатии ноҳияи Айнӣ, ки намояндаи бахши Хадамоти муҳоҷират дар он шомил буд, ҳафтаи сипаригашта дар деҳаи Диҷики ҷамоати деҳоти Фондарё, корҳои иттилоотиву фаҳмондадиҳиро ба роҳ монда, бо фаъолони деҳа, кумитаҳои маҳал ва муҳоҷирони меҳнатии ба ватан бозгашта вохӯрии саривақтӣ баргузор намуданд.
Дар вохӯрӣ муовини раиси ноҳия Мукаррамзода Ф., мудири бахши дин ва танзими ҷашну маросим Шодиев Ш., мудири шуъбаи таблиғот ва иттилооти КИ ҲХДТ дар ноҳия Хокироев М., ва мудири бахши Хадамоти муҳоҷират дар ноҳия Ғайбуллоев Б., иштирок ва суханронӣ намуданд.
Баромадкунандагон зимни баромади худ доир ба муҳтавои Қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”, “Дар бораи масъулият барои таълиму тарбияи кӯдак”, “Дар бораи тарбияи ватандӯстии шаҳрвандон” ва “Дар бораи ворид намудани тағйирот ба Кодекси ҳуқуқвайронкунии маъмурии Ҷумҳурии Тоҷикистон” (моддаи 382-“ Риоя накардани қоидаҳои истифодаи қувваи барқ ва гармӣ”), сухан ронда, таъкид намуданд, ки масъалаҳои пешгирии омилҳои номатлуби терроризму ифротгароӣ, тарғибу ташвиқи фарҳанги миллӣ, баланд бардоштани ҳисси ватандӯстӣ, ташаккули худшиносиву зиракии сиёсӣ, арҷгузорӣ ба муқаддасоти давлатӣ, хизмат дар сафи Қувваҳои Мусаллаҳи Ҷумҳурии Тоҷикистон, ҳифзи арзишҳои фарҳангӣ миллӣ, тарғиби тарзи ҳаёти солим ва пешгирии ҷудошавии оилаҳои ҷавон дорои аввалиндараҷа мебошанд.
Сипас мудири бахши Хадамоти муҳоҷират дар ноҳияи Айнӣ Ғайбуллоев Б., суханронӣ намуда, қайд кард, ки дар ҷаҳони имрӯза дар ҳамагуна давлатҳо таҳдиди терроризм ва экстремизм вуҷуд дорад ва пешгирӣ аз ҳамин гуна вабои аср давлатҳои ҷаҳонро водор сохтааст, ки созмонҳову ташкилотҳои гуногунро таъсис диҳанд.
Дар суханҳои худ доимо Асосгузори сулҳу ваҳдати милли, Пешвои миллат муҳтарам Эмомали Раҳмон қайд менамоянд, ки террорист Ватан, модар, дин, забон надорад ва мақсаду ҳадафи онҳо халалдор намудани ҷомеа ва несту нобуд намудани аҳолии осоишта ва ғайраҳо мебошад.
Инчунин, мавриди зикр аст, ки онҳо бо роҳи фиреб, ваъдаи маблағи барзиёд ва таъмин бо ҷойи кори сердаромад ҷавонон, аз ҷумла муҳоҷирони меҳнатӣ ва табақаи аҳолие, ки сатҳи дониш, тафаккур ва ҷаҳонбинии суст доранд ҷалб намуда ҳамагуна ҷиноятҳои вазнинро анҷом медиҳанд.
Барои эмин доштани худ аз доми гурӯҳҳои террористӣ ва экстремистӣ, ҷавонон, муҳоҷирони меҳнатӣ ва дигар табақаи ҷомеаи аҳолӣ бояд аз вожаҳои терроризм, экстремизм ё террорист кист? Кадом гурӯҳҳои ифротӣ мавҷуданд маълумот дошта бошанд.
Ҳангоми муҳоҷират дар хориҷа ба ҳар гуна шахсони алоҳидаи ношинос ва шубҳанок, ки маблағи зиёдро ваъда дода, бо ҳар роҳ дили онҳоро гарм намуда ба гӯруҳҳо ҳамроҳ менамоянд, бовар накарда, аз онҳо дӯрӣ ҷӯянд. Дар шабакаҳои иҷтимоӣ, ки аз тарафи шахсони ба онҳо ношинос паёмакҳои шубҳанок ворид мешаванд ҷавоб надиҳанд.
Дар сурати гирифтор шудан ба ҳар гуна мушкилӣ ба ҳамагон тавсия дода шуд, ки ба сохторҳои дахлдор муроҷиат намоянд ва ба муҳоҷирони меҳнатие, ки дар хориҷи кишвар фаъолият менамоянд тавсия дода шуд, ки дар ҳолати ру ба ру шудан ба чунин ҳолатҳои номатлуб ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ФР, Сафорату Консулгариҳои Ҷумҳурии Тоҷикистон дар Федератсияи Россия муроҷиат намоянд.
Раёсати Хадамоти муҳоҷират дар вилояти Суғд
